मुंबई - महाराष्ट्रात लोकसभेच्या निवडणुकीचा शेवटचा म्हणजेच चौथा टप्पा पार पडल्यानंतर आता १ मे रोजी राज्यात ५९ वा महाराष्ट्र दिन साजरा होत आहे. राजधानी मुंबईत शिवाजी पार्कवर महाराष्ट्र दिनाचा मुख्य सोहळा होणार असून यावेळी राज्यपाल सी. विद्यासागर राव यांचे मुख्य भाषण होणार आहे. मात्र आचारसंहितेमुळे या भाषणावर मर्यादा येणार आहे. राज्यपालांचे भाषण निवडणूक आयोगाने प्रमाणित केले असून हेच भाषण राज्यपाल करणार आहेत.
दुष्काळाच्या छायेत असलेल्या राज्यात, कशा प्रकारच्या उपाययोजना शासन करत आहे. याचा उल्लेख राज्यपाल विद्यासागर राव यांच्या भाषणात होईल. मात्र आचारसंहिता असल्याने शासनाच्या नव्या काही उपाययोजना अथवा यशाबाबद राज्यपाल आपल्या भाषणात उल्लेख करणे टाळतील, असे चित्र आहे. शासनाच्या विविध योजना आणि त्याचे परिणाम याबाबतचे भाष्य राज्यपालांच्या भाषणात होत असते, मात्र आता आचारसंहितेमुळे भाषणावर मर्यादा आल्या आहेत.
सकाळी आठ वाजता मुख्य कार्यक्रमाला सुरुवात होणार असून यावेळी राज्य पोलीस विभागाकडून राज्यपाल सी. विद्यासागर राव यांना मानवंदना दिली जाईल. तसेच राज्यपालांच्या हस्ते ध्वजारोहण होईल. मराठी भाषिकांच्या विविध संस्कृतीचे दर्शन घडवणारे चित्र रथ यावेळी होणाऱ्या संचालनालयात सहभागी होणार आहेत. यावेळी मुख्यमंत्री देवेंद्र फडणवीस यांच्यासह मुख्य सचिव यु.पी.एस. मदन, मंत्रिमंडळातील सहकारी त्याचबरोबर मुंबईचे महापौर विश्वनाथ महाडेश्वर या कार्यक्रमात सहभागी होणार आहेत.
