मुंबई : राज्यातील महिला आणि शेतकऱ्यांच्या प्रश्नावर उत्तर देताना मुख्यमंत्री एकनाथ शिंदे यांनी आज विरोधकांना टोले लगावले. राज्य सरकार हे अतिशय वेगाने काम करीत असून विरोधकांनी चांगल्या कामावर टीका करण्याची गरज नाही. त्या पेक्षा सहकार्याची भूमिका घ्यावी. अजित पवार हे आता सरकारसोबत आले आहेत. विरोधकांसोबत असताना सरकारच्या कामाची गती 20 आणि अजित पवार यांच्या कामाची गती शंभर या वेगाने होती. आता अजित पवारांच्या गतीला मॅच करणारे सरकार त्यांच्यासोबत आहे असे सांगत त्यांनी महाविकास आघाडीवर टीका केली.
बचत गटांना बळ देणार : राज्यातील महिला बचत गटांना अधिक सक्षम करण्यासाठी राज्य सरकारने महत्त्वपूर्ण निर्णय घेतल्याची माहिती मुख्यमंत्र्यांनी सभागृहात दिली. महिलांना सक्षम करण्यासाठी महिला बचत गटांच्या सीआरपी यांच्या मानधनात वाढ करण्यात येत आहे. सीआरपी यांना तीन हजार रुपये मानधन होते ते आता सहा हजार रुपये करण्यात येत असल्याचे त्यांनी सांगितले. याचा लाभ 54 हजार सीआरपींना होणार आहे तर महिला बचत गटांना देण्यात येणाऱ्या भाग भांडवलात ही वाढ करण्यात आली आहे. पंधरा हजार रुपयांना ऐवजी आता तीस हजार रुपये खेळते भाग भांडवल देण्यात येणार आहे. महिला बचत गटांकडून विविध उत्पादने तयार करण्यात येणार असून या उत्पादनांना युनिटी मॉलच्या माध्यमातून विक्रीसाठी उपलब्ध करून देण्याचा राज्य सरकारचा विचार असल्याचे मुख्यमंत्र्यांनी सांगितले.
गणवेश शिवून घेण्याचे काम : तसेच महिला बचत गटांना रोजगार मिळण्यासाठी शाळेतील मुलांच्या गणवेश शिवून घेण्याचे काम या बचत गटांना देण्यात येणार असल्याचेही मुख्यमंत्र्यांनी सांगितले. साडे चौदा लाख शेतकऱ्यांना 50 हजार रुपये परतावादरम्यान राज्य सरकारच्या शेतकरी सन्मान योजनेअंतर्गत नियमित कर्ज भरणाऱ्या शेतकऱ्यांना 50 हजार रुपये परतावा देण्याचा निर्णय घेण्यात आला होता. मात्र हे पैसे शेतकऱ्यांना देण्यात आले नव्हते. आता सुमारे 15 लाख शेतकऱ्यांपैकी साडे चौदा लाख शेतकऱ्यांच्या खात्यावर हे पैसे जमा करण्यात आले असून अडीच हजार कोटी रुपये यासाठी सरकारने वितरित केल्याची माहिती मुख्यमंत्र्यांनी दिली, तर उर्वरित पन्नास हजार रुपये शेतकऱ्यांना लवकरच मदत दिली जाईल असेही त्यांनी यावेळी सांगितले.
हेही वाचा
