मुंबई- राज्य मंत्रिमंडळातील तिसरे मंत्री कोरोना पॉझिटिव्ह आढळले असून आरोग्य मंत्री राजेश टोपे यांनी आज त्यावर स्पष्टीकरण दिले. सामाजिक न्यायमंत्री धनंजय मुंडे यांना कोरोनाची लागण झाली असून त्यांना ब्रीच कँडी रुग्णालयात दाखल करण्यात येणार आहे. धनंजय मुंडे यांची प्रकृती स्थिर असून, त्यांना कोणतीही लक्षणं नाहीत. श्वसनाचा त्रास झाल्याने त्यांना रुग्णालयात दाखल करत आहोत, असे टोपे यांंनी सांगितले.
धनंजय मुंडे यांच्याबद्दल बोलताना आरोग्यमंत्री राजेश टोपे
दरम्यान, महाविकास आघाडीमध्ये काँग्रेस नाराज असल्याच्या बातम्या येत आहेत. यावर बोलताना टोपे म्हणाले की, राज्य सरकारमधील मंत्री बाळासाहेब थोरात हे काँग्रेसचे सर्वात अनुभवी आणि ज्येष्ठ आमदार मंत्री आहेत. मंत्रिमंडळातील सर्व सदस्य एकदिलाने काम करत आहेत. संकटाच्या काळात नाराजी किंवा खदखद असा विषयच नाही.
राज्यातील वैद्यकीय डॉक्‍टरांच्या भरतीबाबत प्रक्रिया सुरू असून याबाबत ऑनलाइन मुलाखती घेण्याचे नियोजन आहे, असेही टोपे यांनी सांगितले.
