मुंबई - राज्यातील सत्ता स्थापनेचा गुंता लवकरच सुटण्याची चिन्हे आहेत. महायुती सत्ता स्थापन करण्याचे संकेत भाजपचे प्रदेशाध्यक्ष चंद्रकांत पाटील यांनी आज दिले. देवेंद्र फडणवीस यांच्या मागे संपूर्ण भाजप खंबीरपणे उभी असून, त्यांच्याच नेतृत्वाखाली महायुतीचे सरकार स्थापन होणार, असा दावा त्यांनी केला. शिवसेनेकडून अद्यापपर्यंत कोणताही प्रस्ताव आलेला नाही. सेनेच्या प्रस्तावासाठी भाजपची दारे खुली आहेत, असे पाटील यांनी सांगितले.
राज्यात निर्माण झालेल्या सत्तास्थापनेच्या तिढ्याच्या पार्श्वभूमीवर भाजपच्या कोअर कमिटीची बैठक आज मुख्यमंत्र्यांचे निवास्थान असलेल्या वर्षा बंगल्यावर झाली. या बैठकीनंतर प्रसारमाध्यमांशी संवाद साधताना चंद्रकांत पाटील यांनी देवेंद्र फडणवीस हेच राज्याचे मुख्यमंत्री होतील, याचा पुनरुच्चार केला.
हेही वाचा - ...आता शरद पवार काय करणार? संपूर्ण राज्याचे लक्ष
कोअर कमेटीची बैठक झाली आहे. शिवसेनेला प्रस्ताव दिला आहे. सेनेला सोबत घेऊन निश्चित सरकार स्थापना करु, असे वित्तमंत्री सुधीर मुनगंटीवार यांनी सांगितले. तसेच उद्यापासून आम्ही या जनहिताच्या कामाला सुरुवात करु, असे मुनगंटीवार यांनी सांगितले. सेनेला हवे असेल तर पुन्हा प्रस्ताव देऊ, असेही त्यांनी यावेळी सांगितले.
कोअर कमिटीच्या बैठकीला चंद्रकांत पाटील, सुधीर मुनगंटीवार, पंकजा मुंडे, गिरीश महाजन, विनोद तावडे उपस्थित होते.
हेही वाचा - माझा आमदार माझा मुख्यमंत्री' मातोश्रीबाहेर फलक
