Complaint against Lalbagh Raja Mandal : लालबागचा राजा मंडळाविरोधात पोलिसांकडे तक्रार, महिला मुलांसह वृद्धांच्या सुरक्षेचा मुद्दा ऐरणीवर

Complaint against Lalbagh Raja Mandal : लालबागचा राजा मंडळाविरोधात महिलांवरील होणाऱ्या अत्याचारासंदर्भात पोलिसांकडे तक्रार नोंदवण्यात आली आहे. दोन वकिलांनी ही तक्रार दाखल केली आहे. सुरक्षेची व्यवस्था करणे आणि काही अनुचित प्रकार घडू नये यासाठी खबरदारी घेण्याची मागणी यामध्ये करण्यात आली आहे.

मुंबई Complaint against Lalbagh Raja Mandal : लालबागचा राजा सार्वजनिक गणेशोत्सव मंडळाच्या कार्यकर्त्यांकडून आणि सुरक्षारक्षकांकडून होणाऱ्या भाविकांना धक्काबुक्की प्रकरणी वकील आशिष राय आणि पंकज मिश्रा यांनी मुंबई पोलीस आयुक्तांकडे तक्रार दाखल केली आहे. याप्रकरणी जर पोलिसांनी काही कारवाई केली नाही तर आम्ही मुंबई उच्च न्यायालयात जाणार असल्याची माहिती वकील आशिष राय यांनी ईटीव्ही भारतशी बोलताना दिली आहे. (Advocate Ashish rai and Pankaj Mishra)

मुंबई पोलीस आयुक्तांकडे तक्रार - लालबागच्या राजाच्या दरबारात महिला आणि लहान मुलांसारख्या भाविकांच्या सुरक्षेतील त्रुटींबाबत मुंबई पोलीस आयुक्तांकडे तक्रार दोन वकिलांनी दाखल केली आहे. नुकताच एका लाल टी-शर्ट मध्ये असलेल्यानं एका महिलेची कॉलर पकडून तिला धक्काबुक्की केल्याचा व्हिडिओ सोशल मीडियावर व्हायरल झाला होता. त्याचप्रमाणे चेंगराचेंगरीची परिस्थिती उद्भवलेला व्हिडिओ देखील मोठ्या प्रमाणावर सोशल मीडियावर वायरल झाला होता, त्याचा संदंर्भ देऊन वकिलांनी पोलीस आयुक्तांकडे तक्रार दाखल केली आहे.

बेजबाबदार व्यवस्थापन - ‘लालबागचा राजा’च्या मंडपामध्ये मुले, महिला आणि वृद्ध भाविकांसोबत दिवसेंदिवस घडणाऱ्या धक्काबुक्कीच्या घटनांबाबत मुंबई उच्च न्यायालयाचे वकील आशिष राय, पंकज मिश्रा यांनी मुंबई पोलीस आयुक्तांकडे तक्रार दाखल केली आहे. तक्रारीत प्रामुख्याने महाराष्ट्र राज्य प्रशासन, मुंबई पोलीस प्रशासन आणि स्थानिक मंडळ व्यवस्थापक यांच्या बेजबाबदार व्यवस्थापन वृत्तीमुळे सामान्य भाविकांवर होत असलेले अमानुष कृत्य आणि घटनात्मक सुरक्षा व्यवस्थेकडे होत असलेल्या दुर्लक्षावर जोरदार आवाज उठवण्यात आला आहे.

समान सुरक्षा व्यवस्था पुरवावी - घटनेच्या समानतेच्या अधिकाराच्या कलम 14 अन्वये व्हीआयपी आणि सामान्य भाविकांमध्ये कोणताही भेदभाव न करता महाराष्ट्र राज्याच्या पोलीस प्रशासनाने समान सुरक्षा व्यवस्था पुरवावी, अशी मागणी तक्रारीत करण्यात आली आहे. लालबागच्या राजाच्या दर्शनावेळी कोणत्याही विशेष पाहुण्यांचे किंवा व्यक्तीचे आगमन होताना सामान्य भाविकांना कोणत्याही अडथळ्याशिवाय दर्शन घेता यावे यासाठी योग्य व्यवस्था करण्यात यावी, अशी मागणी वकिलांकडून करण्यात आली आहे.

घटनेच्या कलम 21 अन्वये बालके, महिला आणि वृद्ध जोडप्यांसाठी सुरक्षा आणि सुविधांची भक्कम व्यवस्था करण्यात यावी जेणेकरून भविष्यात मंडळामध्ये कोणतीही अनुचित घटना घडू नये. मंडळाचे व्यवस्थापक आणि इतर कर्मचार्‍यांकडून अपशब्द वापरणे किंवा विनयभंग करणे, अशा तक्रारी नोंदविण्याच्या विशेष सुविधा लाभ आणि मार्गदर्शन करण्यासाठी योग्य व्यवस्थापन केले पाहिजे, अशी मागणी मुंबई पोलीस आयुक्त विवेक फणसाळकार यांच्याकडे वकीलांमार्फत करण्यात आली आहे.

हेही वाचा..