अयोध्येत 'असे' बांधण्यात येणार महाराष्ट्र भवन, मुख्ममंत्री एकनाथ शिंदे ९ एप्रिलपासून युपीच्या दौऱ्यावर

मुख्यमंत्री एकनाथ शिंदे हे ४० आमदारांना सोबत ९ एप्रिल रोजी अयोध्या दौऱ्यावर जात आहेत. त्या पार्श्वभूमीवर उत्तर प्रदेशातील महाराष्ट्र भवनसाठी प्रास्तावित जागेचा शोध राज्य सरकारने सुरू केला आहे. मुख्यमंत्री एकनाथ शिंदे यांच्या अयोध्या दौऱ्यावेळी उत्तर प्रदेशचे मुख्यमंत्री योगी आदित्यनाथ यांच्याशी चर्चा करून यावर शिक्कामोर्तब केले जाणार असल्याची माहिती समोर येत आहे.

मुंबई - अयोध्येत येणाऱ्या प्रत्येक भाविकाला महाराष्ट्रातील रितीरिवाज, संस्कृती, कला आणि जडणघडणीची माहिती व्हावी यासाठी लवकरच महाराष्ट्र भवन उभारले जाणार आहे. महाराष्ट्रातील गड किल्ले, थोर महापुरुषांच्या प्रतिमा, खाद्य संस्कृती आणि महाराष्ट्रातून उत्तर प्रदेशमध्ये जाणाऱ्या जनतेला राहण्याची सुविधा या महाराष्ट्र भवनमध्ये उपलब्ध करून देण्याचा राज्य सरकारकडून प्रयत्न आहे. मुख्यमंत्री एकनाथ शिंदे यांच्या अयोध्या दौऱ्याच्या पार्श्वभूमीवर महाराष्ट्र भवनच्या कामाला गती येणार असल्याचे दिसत आहे.

मुख्यमंत्री शिंदे यांचा दौरा ऐतिहासिक असणार मुख्यमंत्री एकनाथ शिंदे यांच्या अयोध्या दौऱ्याची तयारी अंतिम टप्प्यात आली आहे. मुख्यमंत्र्यांसोबत ४० आमदार असणार आहेत. दौऱ्यासाठी शिवसेना शिंदे गटाचे पदाधिकारी गुरुवारपासून उत्तर प्रदेशात तळ ठोकून आहेत. उद्योगमंत्री उदय सामंत देखील शुक्रवारी ७ एप्रिलला अयोध्येला रवाना होणार आहेत. भाजपबरोबर युतीकरून सत्तेत आल्यानंतर मुख्यमंत्री एकनाथ शिंदे यांनी अयोध्या दौरा करणार असल्याचे जाहीर केले होते. उत्तर प्रदेशचे मुख्यमंत्री योगी आदित्यनाथ यांच्यासोबत उत्तर प्रदेशात उभारण्यात येणाऱ्या महाराष्ट्र भवन संदर्भात चर्चा केली जाणार असल्याची माहिती उद्योग मंत्री उदय सामंत यांनी दिली. तसेच, उत्तर प्रदेशातून मुंबईत आलेल्या लोकांना सोयी सुविधा आणि सहकार्य करायचे यावर मुख्यमंत्री शिंदे चर्चा करणार आहेत. मुख्यमंत्री शिंदे यांचा हा ऐतिहासिक दौरा असेल, असे मंत्री सामंत यांनी सांगितले.