मुंबई Amit Shah Meeting Cancelled : शेती प्रश्नाच्या मुद्द्यावर राज्याचे मुख्यमंत्री एकनाथ शिंदे यांच्यासह उपमुख्यमंत्री देवेंद्र फडणवीस आणि अजित पवार हे आज केंद्रीय गृह तथा सहकार मंत्री अमित शाह यांची भेट घेणार होते. मात्र, आजची भेट रद्द झाली असल्याची माहिती उपमुख्यमंत्री अजित पवार यांनी दिलीय. आजच्याऐवजी सोमवार किंवा मंगळवारची वेळ अमित शाह यांच्या कार्यालयाकडून देण्यात आलीय. मात्र, मुख्यमंत्र्यांसह आम्ही सोमवारी भेटीची वेळ मागितली असल्याचं उपमुख्यमंत्री अजित पवार यांनी सांगितलं. ते आज नागपुरात पत्रकांराशी बोलत होते.
अमित शाह व्यग्र असल्यानं भेट रद्द : कांद्यांच्या निर्यातीवर केंद्र सरकारनं बंदी घातलीय. यामुळं कांद्याच्या दरात मोठी घसरण झाली आहे. याचा शेतकऱ्यांना मोठा फटका बसत आहे. तसंच इथेनॉलच्या निर्मितीवर देखील सरकारनं बंदी घातलीय. त्याचबरोबर दुधाचे दर घसरले आहेत. याच मुद्यावर चर्चा करण्यासाठी मुख्यमंत्री आणि दोन्ही उपमुख्यमंत्री आज दिल्लीला जाऊन गृहमंत्री अमित शाह यांची भेट घेणार होते. मात्र, आजचा दौरा रद्द झालाय. अमित शाह व्यग्र असल्यानं आज होणारी भेट सोमवारी किंवा मंगळवारी होणार आहे.
शरद पवार अमित शाहना भेटण्याची शक्यता : राष्ट्रवादी काँग्रेसचे सर्वेसर्वा शरद पवार यांनीही केंद्रीय गृहमंत्री अमित शाह यांच्या भेटीची वेळ मागितलीय. सूत्रांकडून मिळालेल्या माहितीनुसार शरद पवार अमित शाहा यांना इथेनॉल निर्यात बंदी बाबत केंद्रीय गृहमंत्र्यांना पत्र लिहिणार असल्याची माहिती मिळत आहे. राज्यातील साखर कारखानदारांच्या समस्या देखील ते मांडणार आहेत. राज्यातील जनतेच्या आणि शेतकऱ्यांच्या समस्या सोडवण्यासाठी राज्याचे मुख्यमंत्री आणि दोन्ही उपमुख्यमंत्री दिल्लीत जाऊन महाराष्ट्राच्या पदरात काय पाडून घेतात याकडे महाराष्ट्रातील जनतेचं लक्ष लागलंय. तर राष्ट्रवादी काँग्रेसचे सर्वेसर्वा शरद पवार यांना केंद्रीय मंत्री अमित शाह भेटीची वेळ देऊन महाराष्ट्रातील साखर कारखानदारांचे प्रश्न समजून घेतील का? हे पाहणं महत्वाचं ठरणार आहे.
हेही वाचा :
