मुंबई - राष्ट्रवादी काँग्रेसचे अध्यक्ष शरद पवार यांची सामनाचे कार्यकारी संपादक संजय राऊत यांनी मुलाखत घेतली. या मुलाखतीच्या दुसऱ्या भागात भारत - चीन सीमावाद, देशाची आर्थिक स्थिती, मुख्यमंत्री उद्धव ठाकरे यांची कामगिरी, मनमोहन सिंग, केंद्र सरकारने तज्ञांशी बोलायला हवे, या मुद्द्यांवरील प्रश्नांना शरद पवार यांनी उत्तरे दिली.
भारत- चीन सीमा प्रश्नावर बोलताना पाकिस्तानची चिंता सोडा, चीनकडे लक्ष द्या, असे पवारांनी ठणकावले. त्यांच्या टार्गेटवर आता भारत आहे. चीनबरोबरचा संघर्ष लष्करी ताकदीने सुटणार नाही, डिप्लोमॅटिक पद्धतीनेच तो सोडवावा लागेल. चीनच्या राष्ट्रपतींशी गळाभेटीने ते कसे काय साध्य होणार, असा खडा सवाल त्यांनी केला. चीन आर्थिकदृष्ट्या मजबूत आहे. आपल्या शेजारचे नेपाळ, बांग्लादेश हे देश आपल्या सोबत राहिले नाहीत ते चीनच्या बाजूने गेले आहेत, असेही शरद पवार म्हणाले.
नरेंद्र मोदी यांचे आपण गुरु आहात, असा प्रश्न राऊत यांनी विचारल्यावर राजकारणात कोणी कुणाचाच गुरू नसतो, फक्त सोय पाहिली जाते!, असे शरद पवार म्हणाले.
उद्धव ठाकरे यांचा सहा महिन्यांचा परफॉर्मन्स शंभर टक्के उत्तम आहे. विद्यार्थी सहामाही परीक्षेत पास झाला आहे!, असे शरद पवार यांनी स्पष्टपणे सांगितले.
देशाची अर्थव्यवस्था कोलमडली आहे. ती सावरण्यासाठी देशाला आणखी एका मनमोहन सिंग यांची गरज आहे, असेही शरद पवार म्हणाले. त्यांनी मुलाखतीच्या दुसऱ्या भागात राष्ट्रीय, आंतरराष्ट्रीय प्रश्न व राष्ट्राच्या सुरक्षेच्या प्रश्नांवर मते मांडली.
