मुंबई - मुसळधार पावसामुळे पूर्व उपनगरातील चेंबूर व टिळक नगर उडाणपूल येथील सखल भागात गुडघाभर पाणी साचले आहे. त्यामध्येच रस्त्याचा अंदाज न आल्याने एका 26 वर्षीय तरुण 20 फूट खोल उघड्या मॅनहोलमध्ये (ड्रेनजचे उघडे झाकण) अडकला होता. दरम्यान, तत्काळ घटनास्थळी दाखल झालेले पोलीस हवालदार संजय पवार यांच्या प्रसंगवधानामुळे या तरुणाला जीवदान मिळाले असून देव तारी त्याला कोण मारी या म्हणीचे प्रचिती आली आहे.
मुंबईत दोन दिवसांपासून मुसळधार पावसामुळे चेंबूर व टिळक नगर परिसर संपूर्ण पाण्याने भरून गेला होता. गुडघाभर पाणी साचल्याने नागरिकांना पायाखालची वाटही दिसत नव्हती. संतोष पवार हा तरुण पाण्यातून वाट काढत अमर महलवरून टिळक नगर उड्डाण पुलाखालून चालत नेहरू नगरकडे होता. दरम्यान, तो पाण्याखालील अर्धे उघडे असलेल्या मॅनहोलमध्ये अडकला. आपले जीव वाचविण्यासाठी तो जीवाचा आटापीटा करू लागला. मात्र, पाण्याचा प्रवाह जास्त असल्याने त्याला बाहेर निघता येत नव्हते.
दरम्यान, या मार्गवरुन राजन नाडर हे जात होते. त्याच्या लक्षात ही घटना येताच त्यांनी टिळक नगर पोलीस ठाण्याला माहिती दिली. लगेच पोलीस हवालदार संजय पवार व त्यांच्या सहकाऱ्यांंनी घटनास्थळी धाव घेत पालिकेला याबाबत माहिती दिली. संजय पवार यांनी स्वतः पाण्यात उतरुन मॅनहोलमध्ये अडकलेल्या संतोषला तत्काळ बाहेर काढल्याने या तरुणाला जीवदान मिळाले आहे. यामुळे पोलीस हवालदार संजय पवार यांचे सर्वत्र कौतुक होत आहे. देव तारी त्याला कोण मारी या म्हणीची प्रचिती येथे दिसून आली आहे.
