मुंबई: बृहन्मुंबई महानगरपालिका सुरक्षा दलातील सुरक्षा रक्षक अमित सुरेश साटम यांनी (BMC Security Guard Gold Medal) लोणावळा येथे ‘महाराष्ट्र बॉडी बिल्डर असोसिएशन’द्वारे आयोजित ‘शरदचंद्र श्री २०२२’ या राज्यस्तरिय शरीरसौष्ठव स्पर्धेत अव्वल कामगिरी करत ८५ किलो वजनी गटात सुवर्ण पदक मिळविले आहे. ( State Level Bodybuilding Competition) या गौरवामुळे बृहन्मुंबई महापालिकेच्या सुरक्षा दलाच्या शिरपेचात ( International competition ) आणखी एक मानाचा तुरा रोवला गेला आहे.
विविध स्पर्धांमध्ये सहभागी: परळ स्थित राजे एडवर्ड स्मारक (केईएम) रुग्णालयात अमित साटम हे सुरक्षा रक्षक म्हणून २०१४ पासून कार्यरत आहेत. सुरक्षा दलातील नोकरी सांभाळून ते दररोज ३ तास व्यायाम करण्यासह ५ किलोमीटर धावण्याचा देखील नियमित सराव करीत असतात. साटम हे गेल्या ५ वर्षे विविध शरीरसौष्ठव स्पर्धांमध्ये सहभाग नोंदवित असून एप्रिल २०२२ मध्ये पुणे येथील शिव छत्रपती क्रीडा संकुल येथे झालेल्या आंतरराष्ट्रीय स्पर्धेतील पहिल्या १० स्पर्धकांमध्ये त्यांचा समावेश होता. तर अनेक जिल्हास्तरिय स्पर्धांमध्ये चमकदार कामगिरी करत त्यांनी विविध पुरस्कार पटकाविले आहेत.
वरिष्ठांकडून अभिनंदन: शालेय व महाविद्यालयीन स्तरावर त्यांनी अनेक कबड्डी स्पर्धांमध्ये सहभाग नोंदवित उल्लेखनीय कामगिरी केली आहे. त्यांनी आपल्या या यशाचे श्रेय कुटुंबियांसोबतच बृहन्मुंबई महानगरपालिकेच्या सुरक्षा दलातील वरिष्ठांना व सहका-यांना दिले आहे. या गौरवाबद्दल अतिरिक्त महानगरपालिका आयुक्त (पश्चिम उपनगरे) डॉ. संजीव कुमार, उप आयुक्त (उद्याने) किशोर गांधी व सुरक्षा दल खात्याचे प्रमुख सुरक्षा अधिकारी अजित तावडे यांनी अमित साटम यांचे अभिनंदन करत त्यांच्या पुढील वाटचालीस शुभेच्छा दिल्या आहेत.
