मुंबई - मुंबई उच्च न्यायालयात भारतीय नागरिकत्व मिळावे म्हणून गेली अनेक वर्षे कायदेशीर लढा देणाऱ्या पाकिस्तानी नागरिक आसिफ कराडीया यांना आता भारतीय नागरिकत्व बहाल करण्यात आले आहे.
आसिफ कराडीया यांचे वंशज हे भारतीय होते मात्र १९४७ च्या फाळणीनंतर कराडीया यांचे कुटुंब पाकिस्तानात स्थलांतरित झाले होते. पण आसिफ कराडीया यांनी काही वर्षातच पुन्हा भारतात येऊन मुंबईत राहण्यास सुरवात केली होती. पत्नी, तीन मुले असा आसिफ यांचे कुटुंब आहे. पण प्रदीर्घ व्हिसाची मुदत संपल्यावर आसिफ कराडीया यांना देश सोडण्याचे आदेश देण्यात आले होते. यावेळी २०१६ साली आसिफ मुंबई उच्च न्यायालयात धाव घेऊन आपण गेली ५० वर्षे भारतात राहत असून भारतीय नागरीकत्वासाठी अर्ज करूनही त्यावर कुठलाही निर्णय होत नसल्याचे मुंबई उच्च न्यायालयाच्या निदर्शनास आणून दिले होते.
यावर मुंबई उच्च न्यायालयाने केंद्रीय गृह मंत्रालयाने यावर प्रतिज्ञापत्र सादर करण्यास सांगितले असता, केंद्रीय गृह मंत्रालयाने येत्या 10 दिवसात आसिफ कराडीया यांना भारतीय नागरिकत्व देण्यात येईल असे सांगितले, त्यानुसार १ एप्रिल २०१९ ला केंद्रीय गृहखात्याकडून आसिफ अब्बास कराडीया यांना भारतीय नागतिकत्व बहाल करण्यात आले आहे.
