मुंबई - भाजप कोरोना विषाणूपेक्षा घातक आहे. त्यामुळे काळजी घेतलीच पाहिजे, या विषाणूवरती उपाय शोधण्याचे प्रयोग सुरू आहेत, अशी टीका सार्वजनिक बांधकाम मंत्री अशोक चव्हाण यांनी केली.
मध्य प्रदेशचे मुख्यमंत्री कमलनाथ हे एक सक्षम मुख्यमंत्री आहेत. भाजपने कितीही प्रयत्न केला तरी मध्यप्रदेशात काँग्रेस सरकारला कोणताही धोका होणार नाही. ज्या राज्यांमध्ये आपली सत्ता नाही अशा राज्यांमध्ये 'ऑपरेशन लोटस'च्या नावाखाली गोंधळ माजवण्याचा प्रयत्न करणे ही भाजपची नेहमीची सवय आहे, असे अशोक चव्हाण म्हणाले. भाजपच्या या धोरणाला खतपाणी घातले जाणार नाही, याची काळजी लोकशाही मानणाऱ्या सर्व पक्षांनी घेतली पाहिजे, असेही चव्हाण म्हणाले.
हेही वाचा - कमलनाथ सरकार धोक्यात? मध्य प्रदेशमध्ये भाजपचे 'ऑपरेशन लोटस' सुरू
दरम्यान, आरटीआय कार्यकर्ते आनंद राय यांनी मध्य प्रदेशच्या राजकारणात घोडेबाजार सुरू झाल्याचा आरोप केला आहे. भाजपकडून काँग्रेसच्या आमदारांना 100 कोटींची ऑफर दिल्याचे त्यांनी म्हटले आहे. भाजप सध्याच्या काँग्रेस सरकारमधील आमदारांना खरेदी करून सरकार पाडण्याचा डाव करत असल्याचे राय यांनी म्हटले आहे. या पार्श्वभूमीवर चव्हाण यांनी भाजपवर टीका केली.
