सीएसएमटीच्या हेरिटेज इमारतीच्या दर्शनी भागाचे 90 टक्के काम पूर्ण

ऐतिहासिक आणि जागतिक वारसा लाभलेल्या सीएसएमटीच्या इमारतीची दुरूस्ती आणि सुशोभिकरण सुरू आहे. सध्या या कामाला वेग आला असून आणखी एक वर्षात संपूर्ण इमारतीचे काम पूर्ण होण्याची अपेक्षा आहे.

मुंबई - जागतिक वारसा लाभलेल्या छत्रपती शिवाजी महाराज टर्मिनसच्या(सीएसएमटी) हेरिटेज इमारतीला नवीन झळाळी देण्याचे काम वेगात सुरू आहे. या इमारतीच्या दर्शनी भागाचे 90 टक्के काम पूर्ण झाले आहे. दर्शनी भागाचे उर्वरित काम एप्रिल महिन्याअखेर पूर्ण करण्यात येणार आहे. तर, संपूर्ण इमारतीचे काम पूर्ण करण्यासाठी आणखी एका वर्षाचा कालावधी लागणार आहे.

इमारतीचे तडे भरून काढण्याचे काम पूर्ण -

सीएसएमटीच्या इमारती युनेस्कोच्या जागतिक दर्जाच्या ग्रेट-1 या हेरिटेज इमारतींमध्ये समाविष्ट आहेत. त्यामुळे या इमारतींचे देखभाल आणि दुरुस्तीसाठी कुशल कारागीर, दगड कारागीर, अभियंते आणि पर्यवेक्षक यांच्या अनुभवाच्या जोरावर दुरुस्तीचे काम सुरू आहे. आतापर्यंत हेरीटेज इमारतीच्या बाहेरील भिंतीवर काही प्रमाणात तडे पडले होते, ते तडे भरून काढण्याचे काम पूर्ण झाले आहे. तसेच इमारतीच्या समोरच्या भागाच्या दगडांची स्वच्छता करण्यात आलेली आहे. हाय प्रेशरच्या पाण्याचा वापर करून ही स्वच्छता करण्यात आली. तसेच हवामानातील बदलामुळे छत्रपती शिवाजी महाराज टर्मिनलच्या मुख्य इमारतीमधील दगडांच्या जोडणीतून रोपे वाढलेली आहेत. ती रोपे देखील काढण्यात आली आहेत.

सीएसएमटीचा दर्शनी भाग

दर्शनी भागाचे 90 टक्के काम पूर्ण - छत्रपती शिवाजी महाराज टर्मिनल हे जागतिक वारसा यादीत आहे. मध्य रेल्वे प्रशासनाकडून नियमित या जागतिक वास्तूची देखरेख केली जाते. सीएसएमटी रेल्वे स्थानकाच्या नूतनीकरणाचे काम सुरू आहे. या स्थानकांच्या बाहेरील दर्शनी भागाचे 90 टक्के काम पूर्ण करण्यात आलेले आहे. पुढील महिन्यात ही सर्व कामे पूर्ण होतील तर संपूर्ण इमारतीचे काम होण्यासाठी एका वर्षाचा कालावधी लागणार आहे. सीएसएमटी रेल्वे स्थानकाची देखभाल आणि दुरुस्तीचे काम तज्ञ आणि कुशल कामगारांकडून करून घेण्यात आले आहे, अशी माहिती मध्य रेल्वेचे मुख्य जनसंपर्क अधिकारी शिवाजी सुतार यांनी ईटीव्ही भारतला दिली.

दुसऱ्या टप्प्यातील काम -

सीएसएमटी रेल्वे स्टेशनच्या रिस्टोरेशनच्या कामाला 1997 मध्ये सुरुवात झाली होती. सध्या सुरू असलेले काम हे दुसऱ्या टप्प्यातील आहे. हा संपूर्ण रिस्टोरेशनचा प्रकल्प काही ठराविक टप्यात विभागण्यात आला आहे. आतापर्यंत या इमारतींच्या दर्शनी भागाचे काम 90 टक्के पूर्ण झाले आहे. तसेच आता इमारतीच्या मध्यवर्ती भागातील घुमटाचे काम होणार आहे. स्टार चेंबरचेही काम ठराविक टप्प्यात पूर्ण करण्यात येणार आहे.

हेही वाचा - ईडीचा दणका; काँग्रेसचे ज्येष्ठ नेते सुशीलकुमार शिंदे यांच्या जावयाची संपत्ती जप्त