मुंबई - कुरार पोलीस ठाण्याच्या हद्दीत राहणाऱ्या एका विवाहित महिलेला कामाच्या बहाण्याने गुजरातमार्गे राजस्थानमध्ये नेऊन २ लाख रुपयांना विकणार्‍या टोळीच्या मुसक्या कुरार पोलिसांनी आवळल्या आहेत. पोलिसांनी या संदर्भात तत्काळ तपास करत पीडित महिलेची सुटका करून 6 आरोपींना अटक केली आहे.
कुरार परिसरात राहणाऱ्या कुसुम नावाच्या महिलेने पीडित महिलेला गुजरातमधील सूरत या ठिकाणी 5 नोव्हेंबर रोजी नेले होते. गुजरात आणि राजस्थानमध्ये केटरिंगची भरपूर कामे मिळतात. त्यामुळे, तुला पैसे अधिक मिळतील असे आमिष सदर महिलेने पीडित महिलेला दिले होते. यादरम्यान पीडित महिलेची ओळख राजू व विजय या एजंटशी करून देण्यात आली.
काम मिळवून देण्याच्या बहाण्यानेच पीडित महिलेला मुंबईतून सूरतला आणण्यात होते. त्यानंतर तिला राजस्थानमध्ये आणून, त्या ठिकाणी मुकेश नावाच्या व्यक्तीला २ लाख रुपयांचा सौदा करून तिचा जबरदस्तीने राजस्थानमध्ये विवाह लावून दिला होता. या महिलेवर सतत लैंगिक अत्याचार करण्यात आले. काही दिवसांपूर्वी पीडित महिलेने राजस्थानमधून पळून जाण्याचा प्रयत्न केला होता. मात्र, तिला पुन्हा पकडून पळून जाण्याचा प्रयत्न केला तर ठार मारू अशी धमकी देण्यात आली होती.
हेही वाचा - 'आप्पा, तुमचाच वारसा चालवतोय.. संघर्षाचा.. जनसामान्यांच्या कल्याणाचा'
दरम्यान पीडित महिलेच्या मुलाने महिन्या भरापासून बेपत्ता असलेल्या आपल्या आईचा शोध घेण्यास सुरुवात केली. यात २ डिसेंबर रोजी त्याला राजस्थानमधून फोन आला. विवेक नावाच्या आरोपीने पीडित महिला ही आपल्या ताब्यात असल्याचे सांगितले. तिला परत घरी पाठवायचे असेल तर २ लाख रुपये द्यावे लागतील, असेही फोन करणारा व्यक्ती म्हणाला. पीडित महिलेच्या मुलाने याबाबत तत्काळ कुरार पोलीस ठाण्यात तक्रार दाखल केली. कुरार पोलीस ठाण्याच्या अधिकाऱ्यांनी या प्रकरणी खंडणी व अपहरणाचा गुन्हा नोंदवीत, तपास सुरू केला. पोलिसांनी केवळ ६ दिवसात पीडित महिलेची राजस्थानमधून सुटका करत विकी रामानंद जांगिड (२२), मुकेश कुमार बद्रीप्रसाद जांगिड (३७), कृष्ण सुमेर कुमार परविन (३३), कुमार लालचंद जांगिड(३३) कविता जाधव उर्फ सलमा भट्टी (३५), कुसुम शिंदे (४५) अशा ६ आरोपींना अटक केली. न्यायालयाने सर्व आरोपींना १५ डिसेंबरपर्यंत पोलीस कोठडीची शिक्षा सुनावली आहे.
हेही वाचा - राज्यभरात दत्त जयंती उत्साहात साजरी; श्रींच्या दर्शनासाह भाविकांनी घेतला आशीर्वाद
