मुंबई - ढोल ताशांचा गजर.. फुलांची आरास.. गुलालाची उधळण करीत गणपती बाप्पा मोरया, पुढच्या वर्षी लवकर या, असा जयघोष करत गणेश भक्तांनी अत्यंत भक्तिभावाने भर पावसात काल (शनिवार) गौरी गणपतीला निरोप दिला. मुंबईच्या समुद्र किनारी व कृत्रिम तलावात रात्री १२ वाजेपर्यंत ४४ हजार ३९७ गौरी आणि गणेश मूर्तींचे विसर्जन करण्यात आले. शनिवारी पाच दिवसांमध्ये २९ हजार ७८१ गणेशमूर्तींचे विसर्जन करण्यात आले आहे.
हेही वाचा - पोलीस बाप्पा देतोय वाहतुकीच्या नियमांचे पालन करण्याचा संदेश
सोमवारी 2 सप्टेंबरला गणरायाचे आगमन झाले आणि भक्तीरसाने अवघी मुंबई न्हावून निघाली. सर्वत्रच चैतन्याचे व उत्साहाचे वातावारण होते. दीड दिवसांच्या बाप्पांला निरोप दिल्यानंतर ५ दिवसांच्या गणपतीचे विसर्जन करण्यात आले. मुंबईतील सर्व चौपाट्या, तलाव आणि जलाशय परिसरात गणपती विसर्जनासाठी गणेश भक्तांनी दुपारपासून गर्दी केली होती. गणपती बाप्पा मोरया, पुढच्या वर्षी लवकर या, अशा जयघोषाने संपूर्ण मुंबई दणाणून गेली. मुंबईतील प्रत्येक गल्लीबोळात आणि प्रत्येक रस्त्यावर ढोलताशांचा गजर आणि गणरायाचा घननाद सुरू होता. पावसाची रिपरिप असतानाही भक्तांचा उत्साह शिगेला पोहचला होता. पुरुषांबरोबर स्त्रीया, तरुण-तरूणींसह अबालवृध्दांनी बाप्पाला निरोप देण्यासाठी चौपाट्यांवर मोठी गर्दी केली होती. अत्यंत उत्साहपूर्ण वातावरणात समुद्र, तलाव आणि कृत्रीम तलावात बाप्पांचे विसर्जन शांततेत पार पाडले. विसर्जनस्थळी पालिकेतर्फे जय्यत तयारी ठेवण्यात आली होती.
