लातूर- यावर्षी लातूरकरांनी ओला आणि कोरडा, असे दोन्हीही दुष्काळ अनुभवले आहेत. निसर्गाच्या लहरीपणाला शेतकरी सामोरे जात असताना आता महावितरणनेही शॉक दिला आहे. ग्रामीण भागात सक्तीने वीजबिल वसुली केली जात आहे. एवढेच नाही तर मंडळनिहाय ठरवून दिलेली वसुलीचे उद्दिष्ट पूर्ण न झाल्यास ते लाईनमनकडूनच वसूल केले जात आहे. त्यामुळे शेतकऱ्यांसह महावितरणचे कर्मचारीही या अजब कारभारामुळे त्रस्त आहेत.
निसर्गाच्या दुष्टचक्रामुळे संपूर्ण खरीप हंगामाला शेतकरी मुकला आहे. शिवाय, अंतिम टप्प्यात झालेल्या अतिवृष्टीमुळे सोयाबीनचेही मोठे नुकसान झाले होते. या अतिवृष्टीचा लाभ आता रब्बी हंगामाला होईल, असा आशावाद शेतकऱ्यांना असतानाच पेरणी लांबल्याने उत्पादनावर परिणाम होणार याची धास्ती शेतकऱ्यांमध्ये आहे. असे असतानाच महावितरणकडून वीजबिल वसुलीची सक्ती ग्रामीण भागात केली जात आहे. त्यामुळे दुष्काळात तेरावा अशी स्थिती निर्माण झाली आहे.
एकीकडे नुकसान मदतीपासून शेतकरी वंचित आहे. तर दुसरीकडे महावितरणकडून सक्तीची वीजबिल वसुली केली जात आहे. ग्राहकांकडून वीजबिल वसूल न झाल्यास थेट लाईनमनकडूनच एक हजाराचा दंड आकारला जात आहे. महावितरणच्या या अजब कारभारामुळे शेतकऱ्यांचे अर्थकारण बिघडले असून ते त्रस्त आहेत. ग्राहकाच्या वसुलीपोटी एक हजाराचा दंड करत आहेत ही अन्यायकारक बाब आहे. तर, वरिष्ठ अधिकाऱ्यांच्या निर्णयाविरुद्ध बोलण्यास लाईनमनही तयार नाहीत. तर वसूली १००% व्हावी. याबाबत लाईनमनला समज यावी म्हणून ही नियमावली असून ही कार्यालयीन बाब आहे. यात नवीन काहीच नाही, असे जनसंपर्क अधिकारी मोहन दिवटे यांनी सांगितले आहे.
हेही वाचा- साथीच्या आजारांना आळा घालण्यासाठी लातूर महापालिकेची स्वच्छता मोहीम
