....म्हणून लातूरच्या जिल्हाधिकाऱ्यांची गणेश मंडळांना हात जोडून विनंती

जिल्ह्यात यंदा सरासरीच्या केवळ 50 टक्के पाऊस झाला आहे. यामुळे नदी- नाले, विहिरी कोरड्या असून, लातूरकरांना 15 दिवसातून एकदा पाणीपुरवठा होत आहे. त्यामुळे यंदा गणेश विसर्जन कुठे करावे, असा प्रश्न जिल्हा प्रशासनाच्या समोर आहे.

लातूर - गणेशोत्सवाच्या काळात पावसाची कृपादृष्टी राहण्यासंबंधी आशावाद जिल्हाधिकारी जी. श्रीकांत यांनी उत्सव सुरू होण्यापूर्वीच्या शांतता समितीच्या बैठकीत केला होता. मात्र, पावसाची अवकृपा कायम राहिल्याने गणेश मूर्तींचे विसर्जन कुठे करायचे, असा प्रश्न उपस्थित झाला आहे. या अनुषंगाने आज जिल्हाधिकारी जी. श्रीकांत यांच्यासह पोलीस प्रशासनाने शहरातील गणेश मंडळाच्या अध्यक्षांची बैठक घेतली. यामध्ये घरगुती गणपतींचे विसर्जन घरातच करावे, तसेच मंडळांनी गणेश मूर्ती दान कराव्यात, अशी विनंती करण्यात आली आहे.

जिल्ह्यात यंदा सरासरीच्या केवळ 50 टक्के पाऊस झाला आहे. यामुळे नदी- नाले, विहिरी कोरड्या असून, लातूरकरांना 15 दिवसातून एकदा पाणीपुरवठा होत आहे. त्यामुळे यंदा गणेश विसर्जन कुठे करावे, असा प्रश्न जिल्हा प्रशासनाच्या समोर आहे. यापूर्वी शांतता समितीच्या बैठकीतही जिल्हाधिकाऱ्यांनी गणेश मूर्तींचे दान करण्याचे आवाहन केले होते.

हेही वाचा लातुरात रेल्वेने पाणी आणल्याचे बील पालिकेच्या माथी, मदत केल्याचे बील कसे मागता - आमदार अमित देशमुख

यानंतर आता घरगुती गणेश मूर्तींचे विसर्जन घरातच करण्यासोबत सार्वजनिक मंडळांनी विसर्जनाच्या ठिकणी गणेश मूर्ती जमा करण्यावर शिक्कामोर्तब झाले आहे. तसेच या मूर्त्या शहरातील मूर्तिकारांना दान केल्या जाणार आहेत.

हेही वाचा हिंगोलीत चक्क जिल्हाधिकाऱ्यांवरच गुन्हा दाखल करण्याचे आदेश !

त्यामुळे आज जिल्हाधिकारी जी. श्रीकांत, पोलीस अधीक्षक डॉ. राजेंद्र माने, अप्पर पोलीस अधीक्षक हिम्मत जाधव, उपविभागीय पोलीस अधीक्षक सचिन सांगळे, मनपा उपायुक्त संभाजी वाघमारे व पोलीस निरीक्षक नानासाहेब लाकाळ यांनी गणेश मंडळांच्या अध्यक्षांची बैठक बोलावून हा निर्णय घेतला. आता लातूरकर याला कसा प्रतिसाद देतील हे पाहणे औत्सुक्याचे राहणार आहे. संबंधित बैठकीत मंडळांच्या अध्यक्षांनीही विविध पर्याय जिल्हा प्रशासनासमोर ठेवले. मात्र, सर्वानुमते हा मूर्तीदानाचा निर्णय घेण्यात आला.

जिल्हाधिकारीही विसर्जन घरातच करणार

यंदा पाण्याची भीषण स्थिती निर्माण झाली आहे. त्यामुळे विसर्जनासाठी जलस्रोतच नसल्याने मोठी समस्या निर्माण झाली आहे. लातूरकरांनी घरच्या मूर्तींचे विसर्जन घरातच करावे, एवढेच नाही तर मी देखील गणेश मूर्तीचे विसर्जन घरातच करणार असल्याचे जी. श्रीकांत यांनी सांगितले.