लातूर - मागील भांडणाची कुरापत काढून महिलेला तिच्या पती व मुलासह मारहाण करण्यात आली. निलंगा तालुक्यातील बोटकुळ गावात ही घटना घडली. यामध्ये महिला गंभीर जखमी झाली आहे. या प्रकरणी पीडित महिलेच्या पतीच्या फिर्यादीवरून पाच जणांविरोधात अ‌ॅट्रॉसिटीचा गुन्हा दाखल करण्यात आला आहे.
निलंगा तालुक्यातील बोटकुळ येथे पीडित महिलेच्या कुटुंबाला गावातील संदीप मोरे, पवन मोरे, नितीन मोरे, सचिन मोरे यांनी लाथा-बुक्यांनी मारहाण केली. या मारहाणीत महिला गंभीर जखमी झाली. सध्या लातूर येथील शासकीय रुग्णालयात तिच्यावर उपचार सुरू आहेत. मागील भांडणाची कुरापत काढून आरोपींनी हे कृत्य केले आहे.
लातूरमध्ये वाढतेय गुन्हेगारी -
गेल्या काही दिवसांमध्ये लातूर जिल्ह्यात गुन्हेगारीच्या अनेक घटना घडत आहेत. दोन दिवसांपूर्वीच औसा तालुक्यातील एका शिक्षकाच्या घरी चोरी झाली. चाकूचा धाक दाखवून घरात घुसलेल्या 5 चोरट्यांनी 1 लाख 25 हजार रुपये रोख रक्कम तसेच दोन तोळे सोने व इतर साहित्याची चोरी केली होती. गेल्या आठवड्यात निलंग्यात दोन मुलींच्या अपहरणाचा प्रयत्न झाला होता.
हेही वाचा - पोलीसच मास्कविना; पोलीस अधीक्षकांनी केले चौघांना निलंबित
