मराठा आरक्षणाचा लढा कायम राहील - पालकमंत्री अमित देशमुख

सर्वोच्च न्यायालयात मराठा आरक्षणाला स्थगिती मिळाल्यानंतर राज्यभरात मराठा समाजाची आंदोलने सुरू आहेत. यातच लातूर जिल्ह्याचे पालकमंत्री अमित देशमुखांच्या घराबाहेर देखील आंदोलन करण्यात आले. यावेळी बोलताना आरक्षणाचा लढा कायम राहील असे आश्वासन पालकमंत्र्यांनी दिले आहे.

लातूर - मराठा आरक्षणाला सर्वोच्च न्यायालयात स्थगिती मिळाली हा मोठा धक्का आहे. मात्र, स्थगिती उठवण्यासंदर्भात राज्य सरकारचा लढा कायम आहे. स्थगिती मिळाल्यानंतर राज्यभरात होत असलेल्या आंदोलनाची दखल राज्य सरकारने घेतली आहे. यापुढेही आरक्षण कायम राहावे यासाठी राज्य सरकार आपल्या स्थरावर प्रयत्न करीत असल्याचे आश्वासन पालकमंत्री अमित देशमुख यांनी आंदोलकांना दिले. पालकमंत्र्यांनी निवेदन स्वीकारल्यानंतर आंदोलकांनी आंदोलन मागे घेतले.

मराठा आरक्षणाला स्थगिती मिळाल्यानंतर राज्यभरात आंदोलने होत आहेत. यानुसार गुरुवारी सकाळी पालकमंत्री अमित देशमुख यांच्या बाभाळगावातील घरासमोर घंटानाद आंदोलन करण्यात आले होते. पालकमंत्री जोपर्यंत निवेदन स्वीकारून आंदोलकांशी संवाद साधत नाहीत तोपर्यंत आंदोलन कायम ठेवण्याची भूमिका त्यांनी घेतली होती. अखेर पालकमंत्र्यांनी आंदोलकांशी संवाद साधला. आंदोलकांशी संवाद साधून राज्य सरकारची भूमिका मांडली. यानंतर दोन तास सुरू असलेले आंदोलन मागे घेण्यात आले. पोलीस भरती रद्द करावी, आंदोलकांवरील गुन्हे मागे घ्यावेत तसेच स्थगिती मिळलेल्या आरक्षणाबाद्दल त्वरित भूमिका स्पष्ट करावी यासारख्या मागण्यांचे निवेदन त्यांना देण्यात आले.

गुरुवारी पालकमंत्री अमित देशमुख यांच्या घरासमोर तर दुसरीकडे अहमदपूरचे आमदार बाबासाहेब पाटील यांच्या घरासमोर आंदोलन करण्यात आले होते. बाभगळगावात तगडा पोलीस बंदोबस्त तैनात करण्यात आला होता.

हेही वाचा - मराठा आरक्षणाचा लढा जिंकण्यासाठी सर्वोच्च प्रयत्न करणार - मुख्यमंत्री