कोल्हापूर : त्र्यंबोली यात्रा म्हणजे गल्लीची जत्रा म्हणून ओळख असणाऱ्या यात्रेचा आज शेवटचा दिवस. आषाढातील मंगळवार आणि शुक्रवारी यात्रेत भाविकांची गर्दी होत असते. शहरात सर्वच पेठांमध्ये यात्रेची धूम दिसून येत आहे. पंचगंगा नदीचे नवे पाणी त्र्यंबोली देवीला वाहले जाते. आज यात्रेचा शेवटचा दिवस असल्याने, शहरातील बहुतांश मंडळांकडून याची जोरदार तयारी करण्यात आली आहे. पी ढबाक, हलगी गुणक्यासह साऊंड सिस्टीमसुद्धा मोठ्या प्रमाणात यात्रेत सहभागी झाले.
गेल्या अनेक वर्षांपासून परंपरा : कोल्हापुरात पंचगंगा नदीला आलेल्या नव्या पाण्याची पूजा करण्याची अनोखी परंपरा मागील अनेक वर्षापासून सुरू आहे. आज शहरातील नागरीक आणि पेठातील तालीम मंडळांच्या कार्यकर्त्यांनी वाजत-गाजत नव्या पाण्याचे स्वागत केले. कोल्हापुरात आजच्या दिवशी त्र्यंबोली देवीची यात्रा भरते. या दिवशी पंचगंगा नदीला आलेल्या नव्या पाण्याची पूजा करून, त्यानंतर हे पाणी देवीला आणि घरातील देवांना वाहिले जाते. मागील अनेक वर्षांपासून कोल्हापूरकरांची ही परंपरा अखंडितपणे सुरू आहे. तर आज सकाळपासूनच शहरातील नागरिक आणि पेठांच्या कार्यकर्त्यांनी मोठ्या उत्साहात आणि पारंपरिक पद्धतीने पंचगंगा नदीतील या नव्या पाण्याची पूजा केली.
अशी असते प्रथा : करवीरची रक्षणकर्ती म्हणून ओळखल्या जाणार्‍या त्र्यंबोली देवीला, वर्षातून एकदा पंचगंगेचे पाणी वाहण्याची तसेच आंबील-घुगर्‍याचा नैवेद्य देण्याची प्रथा आहे. प्रथेनुसार शहरातील पेठांतून तसेच उपनगरातील गल्‍ली- बोळातून देवीची आषाढातील सार्वजनिक यात्रा साजरी केली जाते. पावसानंतर नदीला येणारे नवे पाणी कावडीतून तसेच कुमारी मुलींच्या डोईवरून वाजत-गाजत त्र्यंबोली देवीला अर्पण केले जाते. अनेक मंडळे परंपरेनुसार नारळाच्या झावळ्यांनी सजवलेल्या बैलगाडीतून कलश घेऊन यात्रेला येतात. आषाढ सुरू झाल्यानंतर अनेकजण घरगुती नैवेद्य करतात. तसेच यात्रेसाठी टेंबलाई टेकडी सज्ज झाली आहे, प्रसादाची दुकाने, खेळण्यांची दुकाने सजली आहेत.
हेही वाचा -
