कोल्हापूर - जिल्ह्यात कोरोनाचा प्रादुर्भाव मोठ्या प्रमाणात पसरला आहे. याच पार्श्वभूमीवर जिल्ह्यातील वाढती संख्या लक्षात घेता, कोल्हापूर जिल्हा प्रशासनाने आरोग्य विभागामार्फत खेडोपाड्यात कोरोना अँटिजन चाचणीचा धडाका सुरू केला आहे. दररोज 10 ते 15 हजारांहून अधिकांच्या चाचण्या केल्या जात असून कोरोनाचा प्रसार रोखण्यासाठी प्रशासनाने महत्वपूर्ण पाऊल उचलले आहेत. अनेक गावांत तर लसीकरणाला ज्या पद्धतीने रांगा लावत आहेत, त्याच पद्धतीने कोरोना चाचणीसाठी नागरिक रांगा लावत असल्याचे चित्र आहे. गेल्या 10 दिवसांत जवळपास 2 लाख चाचण्या घेण्यात आल्या असून त्यामध्ये सुमारे 15 हजार कोरोना पॉझिटिव्ह रुग्ण आढळले आहेत.
कोरोना रुग्णांच्या संख्येवर एक नजर
कोल्हापूर जिल्ह्यात आजपर्यंत एकूण 10 लाख 96 हजार 332 जणांच्या कोरोना चाचण्या घेण्यात आल्या आहेत. त्यामध्ये 1 लाख 55 हजार 758 जणांना कोरोनाची लागण झाली असून 1 लाख 38 हजार 694 जणांनी कोरोनावर मात केली आहे. या दीड वर्षात तब्बल 4 हजार 712 जणांचा कोरोनाने बळी घेतला असून सद्यस्थितीत 12 हजार 352 सक्रिय रुग्ण आहेत. सध्या जिल्ह्यातील विविध ठिकाणी हे रुग्ण उपचार घेत आहेत. विशेष म्हणजे एकूण 1 लाख 55 हजार 758 रुग्णांपैकी 86 हजार रुग्ण हे केवळ मे आणि जून महिन्यात वाढले आहेत. त्यामुळे गेल्या दोन महिन्यात मोठ्या प्रमाणात कोरोनाच्या चाचण्याही केल्या असल्याचे समोर आले आहे.
गेल्या एक आठवड्यापासून 10 ते 15 हजारांहून अधिकांच्या चाचण्या
उपमुख्यमंत्री अजित पवार यांनी कोल्हापूर जिल्ह्याच्या कोरोना परिस्थितीचा आढावा घेतल्यानंतर दररोज चाचण्या वाढवल्या जात आहेत. यासाठी जिल्ह्यातील दुर्गम भागासह अनेक खेडोपाड्यात जाऊन आरोग्य विभागाकडून कोरोना चाचण्या घेतल्या जात आहेत. यामध्ये गेल्या 21 जूनपासून दररोज 15 हजारांहून अधिक कोरोना चाचण्या होत असून या 9 दिवसांत तब्बल 1 लाख 86 हजार 131 कोरोना चाचण्या करण्यात आल्या असून यामध्ये 13 हजार 358 रुग्ण पॉझिटिव्ह आढळले आहेत. दरम्यान, कोरोनाचा प्रादुर्भाव रोखण्यासाठी जिल्हा प्रशासनाने मोठ्या प्रमाणात उपाययोजना केल्या असून चाचण्यांवर भर देण्यात आली आहे.
अनेक गावांत लसीकरणाप्रमाणे कोरोना चाचणीसाठी रांगा
एकीकडे प्रशासनाकडून कोरोनाचा प्रादुर्भाव रोखण्यासाठी विविध उपाययोजना केल्या जात असून दुसरीकडे जिल्ह्यातील नागरिकांकडून त्याला चांगल्या पद्धतीने प्रतिसादही मिळताना पाहायला मिळत आहे. सध्या जिल्ह्यात वाढत्या कोरोना प्रादुर्भावाच्या पार्श्वभूमीवर कोरोनाच्या चाचण्यांवर भर दिला जात आहे. अनेक गावांमध्ये 'अँटिजन टेस्ट' कॅम्पचे आयोजन केले जात असून ज्या पद्धतीने लसीकरणासाठी नागरिक रंगा लावत असल्याचे राज्यात चित्र आहे, त्याच पद्धतीचे चित्र कोल्हापूर जिल्ह्यात कोरोनाची चाचणी करून घेण्यासाठी लागत असल्याचे पाहायला मिळत आहे. शिवाय जास्तीत जास्त नागरिकांनी कोरोना चाचणी करून घ्यावी, असे आवाहनही केले जात आहे. त्यामुळे जिल्ह्यासाठी ही एक दिलासादायक बाब ठरत आहे.
कोल्हापुरातील लसीकरण परिस्थितीवर एक नजर
कोल्हापूर जिल्ह्यात सद्यस्थिती 9 लाख 92 हजार 510 जणांनी पहिला डोस घेतला आहे. त्यामध्ये आरोग्य विभागातील 43 हजार 749 जणांचा समावेश आहे. 79 हजार 560 फ्रंटलाईन वर्कर, 18 ते 45 वर्षांतील 17 हजार 810, 45 ते 60 वर्ष वयातील 4 लाख 15 हजार 469 आणि 60 वर्षांवरील 4 लाख 35 हजार 932 जणांनी लसीचा पहिला डोस घेतला आहे. यातील 2 लाख 86 हजार 588 जणांनी कोरोनाचा दुसरा डोस घेतला आहे. जिल्ह्याची एकूण लोकसंख्या आणि कोरोनाचा वाढता प्रादुर्भाव पाहाता जिल्ह्यात खूप सावकाश गतीने लसीकरण सुरू असल्याचे आकडेवारीवरून दिसत आहे. प्रशासनाने लसीकरणासाठी योग्य नियोजन करून प्रादुर्भाव रोखण्यासाठी जास्तीत जास्त नागरिकांचे लसीकरण करणे गरजेचे आहे.
हेही वाचा - ...तर प्रशासनाच्या नियमांना न जुमानता दुकाने सुरू करू - व्यापारी संघटना
