KCR On Kolhapur Visit : केसीआर यांनी घेतले अंबाबाईचे दर्शन; दौऱ्याचे जिल्ह्यावर उमटणार परिणाम

तेलंगाणा राज्यामध्ये सलग दोनवेळा सत्ता काबीज केल्यानंतर तेलंगाणाच्या मुख्यमंत्र्यांनी महाराष्ट्राकडे मोर्चा वळविल्याचे दिसत आहे. ते महाराष्ट्रात पाय रोवण्यासाठी प्रयत्न करत आहेत. मुख्यमंत्री के. चंद्रशेखर राव यांनी आज कोल्हापुरात करवीर निवासिनी आई अंबाबाईचे दर्शन घेतले.

कोल्हापूर : तेलंगाणाचे मुख्यमंत्री के चंद्रशेखर राव आज कोल्हापूर, सांगली दौऱ्यावर आहेत. राव यांनी आज करवीर निवासिनी आई अंबाबाईचे दर्शन घेतले. यावेळी त्यांच्यासोबत तेलंगाणा मंत्रिमंडळातील सहकारी आणि खासदार, आमदार मोठ्या संख्येने उपस्थित होते. मुख्यमंत्री के चंद्रशेखर राव यांच्या या दौऱ्याचे कोल्हापूर जिल्ह्याच्या राजकारणावर दूरगामी परिणाम उमटणार आहेत.

महाराष्ट्रात पाय रोवण्यासाठी प्रयत्न सुरू : भारत राष्ट्र समितीकडून जिल्ह्यातील अनेक ठिकाणी तेलंगणामध्ये राव मंत्रिमंडळाने घेतलेल्या अनेक लोकोपयोगी निर्णयांचे मोठे बॅनर लावण्यात आले होते. तेलंगाणात दोन टर्म सत्ता राखण्यात यशस्वी झालेले मुख्यमंत्री के. चंद्रशेखर राव यांनी महाराष्ट्रात पाय रोवण्यासाठी प्रयत्न सुरू केले आहेत. पुढील सहा महिन्यांमध्ये (नोव्हेंबर-डिसेंबर) तेलंगाणामध्ये होऊ घातलेली विधानसभा निवडणूक आणि पाठोपाठ येणाऱ्या लोकसभा निवडणुकीच्या पार्श्वभूमीवर राव यांनी पक्षाच्या विस्ताराचे धोरण आखले आहे.

सोलापुरातही शक्ती प्रदर्शन : के. चंद्रशेखर राव यांनी महाराष्ट्रावर आपले लक्ष केंद्रित केले असून त्यासाठी राज्यात अनेक ठिकाणी सभा घेत आहेत. याच धोरणाचा भाग म्हणून आपल्या संपूर्ण मंत्रिमंडळासह आषाढी वारीनिमित्त ते सोलापुरातही शक्तीप्रदर्शन करण्यात यशस्वी ठरले होते. सोलापूर जिल्ह्यातील राष्ट्रवादीचे माजी आमदार दिवंगत भारत भालके यांचे पुत्र भागीरथ भालके यांच्या पक्षात सहभागी होण्याने, सोलापूर पूर्व भागात पक्ष मजबूत करण्यासाठी राव यांना युवा चेहरा मिळाला आहे. आता साखरपट्टा अशी ओळख असलेल्या पश्चिम महाराष्ट्रात पक्ष मजबूत करण्यासाठी मुख्यमंत्री के चंद्रशेखर राव चाचपणी करत आहेत. त्याचीच पूर्वतयारी म्हणून आज कोल्हापूर आणि सांगली जिल्ह्याचा दौरा राव यांनी केला आहे.