कोल्हापूर - पंतप्रधान नरेंद्र मोदी यांची आधुनिक काळातील छत्रपती शिवाजी महाराज, अशी तुलना करणे काही गैर नसल्याचे वादग्रस्त विधान इचलकरंजीचे भाजपचे माजी आमदार सुरेश हाळवणकर यांनी केले होते. त्यावर हाळवणकर यांनी या पुस्तकाच्या समर्थनाबाबत ठाम असल्याचे सांगितले आहे.
भाजपच्या दिल्लीतील कार्यालयात धार्मिक, सांस्कृतिक संमेलनाचे आयोजन करण्यात आले होते. या संमेलनात पंतप्रधान नरेंद्र मोदी यांची रयतेचे राजे छत्रपती शिवाजी महाराज यांच्याशी तुलना करणाऱ्या पुस्तकाचे प्रकाशन करण्यात आले. त्यावरून महाराष्ट्रात मोठ्या प्रमाणात वादंग निर्माण झाला आहे.
हेही वाचा - मोदींची तुलना शिवाजी महाराजांशी करणे गैर नाही, भाजपच्या माजी आमदाराने तोडले अक्कलेचे तारे
एकीकडे भाजपचे अनेक नेते या पुस्तकाची जबाबदारी झटकत असताना सुरेश हाळवणकर मात्र समर्थनावर ठाम आहेत. गोयल यांच्या पुस्तकाचे समर्थन करणारच शिवाय नरेंद्र मोदींना आज के शिवाजी म्हणणे हे योग्यच असल्याचे म्हणत 'मोदींची तुलना शिवाजी महाराजांच्या बरोबर केली तर वाईट वाटायचं कारण नाही' असेही त्यांनी म्हटले आहे. त्यांनी केलेल्या या विधानानंतर त्यांच्यावर सर्वच स्तरातून टीका होत आहे. शिवाय नेटकरी हाळवणकर यांचा निषेध व्यक्त करताना पाहायला मिळत आहे.
असे असताना हाळवणकर आपल्या समर्थनावर ठाम असल्याने ते आता आणखी अडचणीत येण्याची शक्यता आहे. दरम्यान, समर्थनावर ठाम असल्याचे सांगत छत्रपती शिवाजी महाराज यांचा सन्मान हे वाक्य अनावधानाने बोललो. मला शिवाजी महाराजांचा नाही, तर मोदींचा सन्मान म्हणायचे होते, असे स्पष्टीकरणही त्यांनी दिले आहे.
हेही वाचा - शिवसेनेकडून कर्नाटक सरकारचे श्राद्ध ; मराठी साहित्यिकांवरील बंदीचा केला निषेध
