कोल्हापूर - करवीर निवासिनी अंबाबाईचे दर्शन घेऊन स्वाभिमानी शेतकरी संघटनेचे खासदार राजू शेट्टी यांनी आज आपला उमेदवारी अर्ज दाखल केला. हातकणंगले लोकसभा मतदार संघातून काँग्रेस, राष्ट्रवादी आणि स्वाभिमानी शेतकरी संघटनेच्या वतीने खासदार राजू शेट्टी यांनी आज जोरदार शक्ती प्रदर्शन करत उमेदवारी अर्ज भरला आहे.
या भव्य रॅलीत राजू शेट्टींसोबत किसान संघटनेचे नेते योगेंद्र यादव, राष्ट्रवादीचे प्रदेशाध्यक्ष जयंत पाटील, आमदार हसन मुश्रीफ, खासदार धनंजय महाडिक, काँग्रेसचे नेते आमदार सतेज पाटील, स्वाभिमानीचे प्रदेशाध्यक्ष रविकांत तुपकर यांच्यासह काँग्रेस-राष्ट्रवादी आणि स्वाभिमानी संघटनेचे कार्यकर्ते पदाधिकारी मोठ्या संख्येने उपस्थित होते. विशेष म्हणजे राजू शेट्टी यांनी बैलगाडीतून मिरवणूक काढून आपला अर्ज भरला.
यावेळी रॅलीमध्ये झालेली लोकांची गर्दी पाहून योगेंद्र यादव म्हणाले, राजू शेट्टी हे शेतकऱ्यांसाठी झगडणारे नेते आहेत. मागच्या वेळी ते दीड लाख मतांनी निवडून आले होते. तर आता ते ३ लाख मतांनी निवडून येतील. शेट्टींचा विजय म्हणजे देशातील प्रत्येक शेतकऱ्याचे कल्याण होणार आहे. शेट्टी शेतकऱ्यांसाठी संसदेमध्ये आवाज उठवतील आणि मग शेतकऱ्यांना न्याय मिळेल, असा विश्वासदेखील त्यांनी यावेळी व्यक्त केला.
कोल्हापूरच्या ऐतिहासिक दसरा चौकातून दुपारी १ वाजण्याच्या सुमारास खासदार राजू शेट्टी यांच्यासह काँग्रेस आणि राष्ट्रवादीचे कोल्हापूर जिल्ह्याचे पदाधिकारी हे एकत्र जमले. त्यांनी छत्रपती शाहू महाराजांच्या पुतळ्याला पुष्पहार अर्पण करून रॅलीला सुरुवात केली. दसरा चौकातून निघालेल्या या रॅलीमध्ये मोठ्या संख्येने महिला पुरुष आणि युवक सहभागी झाले होते. यावेळी राष्ट्रवादी काँग्रेसचे प्रदेशाध्यक्ष जयंत पाटील आणि आमदार हसन मुश्रीफ यांनी युती सरकारवर टीका करत आमचे उमेदवार मोठ्या मताधिक्याने विजयी होतील, असा विश्वास व्यक्त केला.
स्वाभिमानी शेतकरी संघटनेचे नेते खासदार राजू शेट्टी यांच्या मालमत्तेत गेल्या ५ वर्षांमध्ये १ कोटी ५२ लाख ६० हजार रुपयांची वाढ झाली आहे. हातकणंगले लोकसभा मतदारसंघातून निवडणुकीचा उमेदवारी अर्ज त्यांनी जिल्हाधिकारी कार्यालय येथे भरला. त्यांनी सादर केलेल्या विवरणपत्रामध्ये ही माहिती सादर केली आहे. २०१४ सली शेट्टी यांची एकूण ८४ लाख इतकी मालमत्ता होती. ती आता २ कोटी ३६ लाख इतकी झाली असून त्यांच्या मालमत्तेत एकूण दीड कोटींहून अधिक वाढ झाली आहे. टक्केवारीचा विचार करता ही तिप्पट वाढ आहे.
