कोल्हापूर Shankarao Pujari New Urban Cooperative Bank : बँकेकडे पुरेसं भांडवल नाही या कारणास्तव इचलकरंजीतील बँकेवर कारवाई करण्यात आली आहे. या बँकेकडं कमाईचं साधन नसल्याचंही कारण देत आरबीआयने इचलकरंजी येथील शंकरराव पुजारी नूतन नागरी सहकारी बँक लिमिटेडचा परवाना रद्द केला आहे. भारतीय रिझर्व्ह बँकेन सोमवारी ही कारवाई केली. RBI नं बँकेला काल म्हणजेच 4 डिसेंबर 2023 पासून सर्व प्रकारचे व्यवहार बंद करण्याचे आदेश दिलेत.
रिझर्व बँकेची कारवाई - कोल्हापुरातील इचलकरंजी येथील शंकरराव पुजारी नूतन नागरी सहकारी बँक लिमिटेडचा परवाना रद्द करण्यात आला असल्याची माहिती रिझर्व बँकेने दिली आहे. रिझर्व बँकेकडून जारी करण्यात आलेल्या पत्रकात शंकरराव पुजारी नूतन नागरी सहकारी बँक लिमिटेड, इचलकरंजी कोल्हापूर ही येत्या 4 डिसेंबर 2023 पासून कोणत्याही प्रकारची बँकिंग सेवा देऊ शकत नाही. यासोबतच बँकेत कोणत्याही ठेवी स्वीकारण्यास किंवा पैशाचे व्यवहार करण्यास पूर्णपणे बंदी घालत आहे, असं म्हणण्यात आलं आहे. बँकेकडे पुरेसं भांडवल आणि कमाईचं साधन नसल्यानं सध्याची बँकेची असलेली आर्थिक स्थिती पाहता बँक सध्याच्या ठेवीदारांना पूर्ण पैसे देऊ शकणार नाही आणि बँकेला बँकिंग सेवा चालू ठेवण्याची परवानगी दिल्यास सार्वजनिक ग्राहकांवर विपरित परिणाम होईल असं पत्रकात म्हटलं आहे.
ठेवीदारांना मिळणार विमा संरक्षण - या बँकेमध्ये जमा असलेल्या ग्राहकांच्या पैशाच्या संदर्भात देखील आरबीआयनं पत्रकात माहिती दिल आहे. बँक ग्राहकांना ठेवीदार विमा आणि क्रेडिट गॅरंटी कॉर्पोरेशन (DICGC) कडून 5 लाख रुपयांपर्यंतच्या ठेवींवर विमा संरक्षणाची सुविधा मिळते. DICGC ही भारतीय रिझर्व्ह बँकेची सब्सिडियरी आहे जी 5 लाख रुपयांपर्यंत विमा सुविधा प्रदान करते. अशा परिस्थितीत ज्या ग्राहकांनी 5 लाख रुपये किंवा त्यापेक्षा कमी रक्कम बँकेत जमा केली आहे, त्यांना संपूर्ण पैसे परत मिळतील. तर 5 लाख रुपयांपेक्षा जास्त पैसे असलेले ग्राहक केवळ 5 लाख रुपयांपर्यंतच्या रकमेसाठी दावा करू शकतील. असंही म्हटलं आहे.
गैरव्यवहार प्रकरणी ऑगस्टमध्ये केला होता गुन्हा दाखल : शंकरराव पुजारी नूतन नागरी सहकारी बँकेत पदाचा दुरूपयोग करत नियमबाह्य कर्ज वाटप करून तब्बल 3 कोटी ५८ लाख ३७ हजार रुपयांचा अपहार केल्याप्रकरणी अध्यक्ष, त्याची पत्नी व शाखाधिकारी, आदींसह १९ जणांवर गावभाग पोलिस ठाण्यात गुन्हा दाखल केला होता. ऑगस्ट 2023 मध्ये हा गुन्हा दाखल करण्यात आला होता. याप्रकरणी प्रशासक धोंडीराम आकाराम चौगुले (रा. राजारामपुरी कोल्हापूर) यांनी तक्रार दिली होती.
