ईटीव्ही भारत एक्सक्लुसिव्ह : कोल्हापुरातील सीपीआर रुग्णालयात कोरोनाबाधित भजनामधून वाढवताहेत मनोबल

काही रुग्ण तरुण असल्याने ते मोबाईलवर वेळ घालवतात. कुटुंबीयांशी बोलत असतात. मात्र, वृद्ध लोकांकडे असे काहीच पर्याय उपलब्ध नाही. त्यामुळे ते व्यापारी कीर्तनाच्या माध्यमातून या वृद्धांचे मनोबल वाढवत आहेत. आजार बरा होणारा आहे. त्यामुळे कोणीही घाबरून जाऊ नका, असेही ते सर्वांना सांगत आहेत.

कोल्हापूर - जिल्ह्यात दिवसेंदिवस कोरोना पॉझिटिव्ह रुग्णांमध्ये वाढच होत असल्याने चिंतेचे वातावरण निर्माण झाले आहे. मात्र, दुसरीकडे एक दिलासा देणारा व्हिडिओ 'ईटीव्ही भारत'च्या हाती लागला आहे. कोल्हापुरातील छत्रपती प्रमिलाराजे रुग्णालयात दाखल केलेले कोरोना पॉझिटिव्ह रुग्ण भजन म्हणत स्वतःला चिंतामुक्त करताना पाहायला मिळत आहेत. यामध्ये अनेक वृद्ध नागरिक आहेत. या सर्व वृद्ध नागरिकांना तणावातून मुक्त करत आणि त्यांचे मनोबल वाढविण्यासाठी गांधीनगरच्या एका व्यापाऱ्याने भजन कीर्तनामध्ये त्यांना व्यस्त ठेवले आहे.

सर्वजण आपापल्या खाटांशेजारी उभे राहून मंदिरात ज्यापद्धतीने भजन करतात अगदी त्याच पद्धतीने रुग्णालयात टाळ्या वाजवत भजन करत आहेत. हरींचे नामस्मरण करत आहेत. शिवाय त्यांच्या चेहऱ्यावरचा तणाव सुद्धा त्यामुळे दूर झाल्याचे दिसून येत आहे. गांधीनगरमधील एका व्यापाऱ्याला कोरोनाची लागण झाली आहे. त्यांना येथील सीपीआर रुग्णालयात दाखल केले आहे. ज्या वॉर्डमध्ये त्यांना दाखल केले आहे तिथे अनेक वृद्ध रुग्ण आहेत, तर काही रुग्ण तरुण असल्याने ते मोबाईलवर वेळ घालवतात. कुटुंबीयांशी बोलत असतात. मात्र, वृद्ध लोकांकडे असे काहीच पर्याय उपलब्ध नाही. त्यामुळे ते व्यापारी कीर्तनाच्या माध्यमातून या वृद्धांचे मनोबल वाढवत आहेत. आजार बरा होणारा आहे. त्यामुळे कोणीही घाबरून जाऊ नका, असेही ते सर्वांना सांगत आहेत.

अ‌ॅक्टीव्ह रुग्णांची संख्या ६०९ -

दरम्यान, जिल्ह्यात आत्तापर्यंत 1585 कोरोना पॉझिटिव्ह रुग्ण आढळले आहेत. त्यातील 934 रुग्णांनी कोरोनावर मात केली आहे, तर 40 जणांचा मृत्यू झाला आहे. त्यामुळे अ‌ॅक्टिव्ह रुग्णांची संख्या 609 इतकी आहे. कोल्हापूर जिल्ह्यातील कोरोना रुग्ण बरे होण्याचे प्रमाण चांगले आहे. तसेच मृत्यूदर देखील कमी आहे. त्यामुळे यापुढेही अशाप्रकारे रुग्णांनी स्वतःचे मनोबल वाढवले, तर जिल्ह्यामध्ये आणखी चांगले चित्र पाहायला मिळू शकते.