नागरिकांनी लॉकडाऊनला चांगला प्रतिसाद द्यावा; पालकमंत्री सतेज पाटलांचे जनतेला आवाहन

कोल्हापूर जिल्ह्यात कोरोनाच्या या दुसऱ्या लाटेत मोठ्या प्रमाणात रुग्ण वाढत आहेत. जानेवारी महिन्यात पॉझिटिव्ही रेट 10 टक्क्यांवर होता तोच पॉझिटिव्ही रेट सध्या 30 टक्क्यांवर पोहोचला आहे. त्यामुळे हा संसर्ग खूप वेगाने पसरतोय हे सिद्ध होत आहे. त्यामुळेच जिल्ह्यात उद्यापासून 8 दिवसांचा कडक लॉकडाऊन जाहीर करण्यात आला आहे, अशी माहिती पालकमंत्री सतेज पाटील यांनी दिली.

कोल्हापूर - कोल्हापुरात प्रशासनाला जे काही शक्य होते ते सर्व काही केले आहे. अजूनही सुविधांमध्ये वाढ करण्यामध्ये आम्ही तत्पर आहे. पण कोरोना रुग्णांची आकडेवारी वाढत गेली तर कितीही सुविधा केला तरीही त्या कमी पडतील त्यामुळे सर्वांनी नियमांचे पालन करा असे पालकमंत्री सतेज पाटील यांनी आवाहन केले. सोशल मीडियाच्या माध्यमातून त्यांनी आज कोल्हापूरच्या जनतेशी संवाद साधला. यावेळी ते बोलत होते. शिवाय कोल्हापुरात जाहीर केलेल्या लॉकडाऊनला नागरिकांनी प्रतिसाद देऊन कोरोनाची साखळी तोडण्यात मदत करा, असे आवाहन सुद्धा त्यांनी यावेळी केले.

कोल्हापुरात पॉझिटिव्ही रेट 30 टक्क्यांवर; सर्वांनी काळजी घेण्याची गरज -

यावेळी जनतेशी संवाद साधताना पालकमंत्री सतेज पाटील म्हणाले, कोल्हापूर जिल्ह्यात कोरोनाच्या या दुसऱ्या लाटेत मोठ्या प्रमाणात रुग्ण वाढत आहेत. जानेवारी महिन्यात पॉझिटिव्ही रेट 10 टक्क्यांवर होता तोच पॉझिटिव्ही रेट सध्या 30 टक्क्यांवर पोहोचला आहे. त्यामुळे हा संसर्ग खूप वेगाने पसरतोय हे सिद्ध होत आहे. त्यामुळेच जिल्ह्यात उद्यापासून 8 दिवसांचा कडक लॉकडाऊन जाहीर करण्यात आला आहे. प्रशासन म्हणून जनतेची संपूर्ण जबाबदारी आम्ही घेतली आहे. मात्र नागरिकांनी सुद्धा आता लॉकडाऊनला चांगला प्रतिसाद देण्याची गरज असल्याचेही पालकमंत्री पाटील यांनी म्हटले. ते पुढे म्हणाले, जिल्ह्यातील मृत्यूदर सुद्धा वाढला आहे. तो कमी करण्यासाठी आम्ही सर्वजण प्रामाणिकपणे प्रयत्त करत आहोत. जिल्हयात आजपर्यंत झालेल्या मृत्यूमध्ये 15 टक्के रुग्ण जिल्ह्याबाहेरचे आहेत. आजपर्यंत एकूण 2 हजार 900 रुग्णांचा मृत्यू झाला आहे त्यातील 163 रुग्ण जिल्ह्याबाहेरचे आहेत.

आजपर्यंत 750 मेट्रिक टन ऑक्सिजन जिल्ह्याबाहेरून आणला -

सध्या अनेकजण लक्षण असून सुद्धा तपासणी करत नाहीत. तब्येत बिघडल्यानंतर सर्वजण उपचार घेत आहेत. असे न करता लक्षणे दिसायला सुरुवात झाल्यानंतर तात्काळ उपचार सुरू करावेत, असेही पालकमंत्री सतेज पाटील यांनी म्हटले. ते पुढे म्हणाले, आजपर्यंत कोरोनाची लागण झालेल्या रुग्णांमध्ये मोठ्या संख्येने रुग्ण बरे होऊन घरी गेले आहेत. जिल्ह्यात सध्या आज 50 टन इतकी गरज आहे. आजपर्यंत कोल्हापूर जिल्ह्यासाठी 750 मेट्रिक टन ऑक्सिजन बाहेरून आणला आहे. जास्तीत जास्त ऑक्सिजन कोल्हापूरमध्येच कसा उपलब्ध करता येईल त्याचे नियोजन सुरू आहे. जिल्ह्यात 14 ठिकाणी ऑक्सिजन निर्मिती प्रकल्प उभारण्यात येत असून त्याद्वारे जवळपास 25 टन ऑक्सिजन मिळणार आहे, असेही सतेज पाटील यांनी म्हटले. शिवाय पूर्वी जिल्ह्यात केवळ 100 व्हेंटिलेटर होते ते आता 400 पर्यंत पोहोचले असल्याचेही सांगत जिल्ह्यात शक्य ती सर्व सुविधा देण्यासाठी प्रशासन प्रयत्नशील असून नागरिकांनी सुद्धा आता नियमांचे पालन करण्याचे आवाहनही त्यांनी केले.

दररोज 1 हजार पेक्षा जास्त रेमडेसिवीर कोल्हापूर जिल्ह्याला मिळणार -

कोरोना रुग्णांवरील उपचारासाठी रेमडेसिवीर इंजेक्शन उपयुक्त ठरले आहे. त्याच इंजेक्शनचा जिल्ह्यात केवळ 200 ते 300 इतका पुरवठा होत होता. मात्र आता तो वाढवून जिल्ह्यात 1 हजारहून अधिक इंजेक्शन दररोज येतील, असा विश्वास सुद्धा पालकमंत्री सतेज पाटील यांनी व्यक्त केला. असे सांगत आज जिल्ह्यात 5 हजार 800 गरजू नागरिक शिवभोजन थाळीचा लाभ घेत असल्याचे म्हटले. शिवाय शासनाने जाहीर केलेले पॅकेज पुढच्या 8 दिवसात नागरिकांच्या खात्यावर जमा होईल, असेही त्यांनी म्हटले.