कोल्हापूर - कोरोना विषाणूचा वाढता प्रादुर्भाव पाहता देशात कधी नव्हे एवढे स्थलांतर होत आहे. अनेकजण कोरोनाच्या भीतीने आपल्या गावी परतत आहेत. अशाच एका कुटुंबाचा दुचाकीवरून गावी जात असताना २५ मार्च रोजी कराडजवळ भीषण अपघात झाला. यात पती-पत्नी आणि सहा वर्षांच्या मुलाचा समावेश होता. अपघातात गंभीर जखमी झालेल्या या सर्वांना उपचारासाठी रुग्णालयात दाखल करण्यात आले होते. मात्र, तिघांचाही उपचारादरम्यान मृत्यू झाला आहे. शाहुवाडी तालुक्यातील जांबूर गावातील हे कुटुंब होते.
हेही वाचा... तेलंगणामध्ये ट्रक-पिकअपचा भीषण अपघात, 6 ठार, 6 जखमी
सर्जेराव भीमराव पाटील (३५), पूनम सर्जेराव पाटील (२९) हे पती-पत्नी आणि त्यांचा सहा वर्षाचा मुलगा अभय अशी मृतांची नावे आहेत. २५ मार्चला त्यांचा कराड शहरातील डी-मार्ट समोर महामार्गावरील दुभाजकाला दुचाकी धडकल्याने अपघात झाला होता. अपघातानंतर तिघांनाही उपचारासाठी रुग्णालयात दाखल करण्यात आले होते. त्यापैकी अपघाताच्या दुसऱ्या दिवशी पती सर्जेराव पाटील आणि मुलगा अभय यांचा मृत्यू झाला होता. तर मागील दोन दिवसांपासून पुनम यांच्यावर उपचार सुरू होते. मात्र, आज उपचारादरम्यान त्यांचाही मृत्यू झाला. या कुटुंबाच्या मृत्यूमुळे जांबूर गावावर शोककळा पसरली आहे.
