खोदकामात सापडले चक्क १ एकर तळे, दलदलीत दडलेले ऐतिहासिक बांधकाम समोर

खोदकाम करताना अनेकदा जुन्या काळातील वस्तू, अवजारे, नाणी सापडल्याची उदाहरणे आपण ऐकली आणि वाचलीही असतील. मात्र, खोदकामानंतर चक्क एक एकर परिसरात पसरलेले पुरातन तळे करवीर तालुक्यातील वाकरे गावात सापडले आहे. हे तळे बाराव्या शतकातील असल्याचा अंदाज व्यक्त केला जात आहे.

कोल्हापूर - खोदकाम करताना अनेकदा जुन्या काळातील वस्तू, अवजारे, नाणी सापडल्याची उदाहरणे आपण ऐकली आणि वाचलीही असतील. मात्र, खोदकामानंतर चक्क एक एकर परिसरात पसरलेले पुरातन तळे करवीर तालुक्यातील वाकरे गावात सापडले आहे. सौरऊर्जेचा प्रकल्प उभा करत असताना सुरू असलेल्या खोदकामावेळी चक्क जुन्या काळातील भल्या मोठ्या तळ्याचा शोध लागला आहे. गेल्या अनेक वर्षांपासून ज्या ठिकाणी दलदल होती. त्याठिकाणी इतका मोठा पौराणिक ठेवा सापडल्याने आता सर्वांनीच आश्चर्य व्यक्त केले आहे. याठिकाणी काही जुन्या वस्तूही सापडत आहेत.

तळे बाराव्या शतकातील असल्याचा अनेकांचा अंदाज

कोल्हापूर शहरापासून अवघ्या 14 किलोमीटर अंतरावर असलेल्या करवीर तालुक्यातील वाकरे गावात खासदार संजय मंडलिक यांच्या फंडातून सौरउर्जा प्रकल्प उभा करण्याचे काम सुरू होते. यासाठी सुरुवातीला गावातील दलदलीच्या परिसरात खोदकाम करून त्याठिकाणी सौरऊर्जा प्रकल्प उभा करायचे नियोजन होते. पण, त्यानुसार त्या दलदलीच्या ठिकाणी खोदकामाला सुरुवात झाली असता काही फूट खोल गेल्यानंतर जांभ्या खडकांच्या पायऱ्या असल्याचे दिसून आले. बघता बघता एक मोठे जुने तळे असल्याचे स्पष्ट होऊ लागले. दरम्यान, अनेकजण त्या ठिकाणी तळे होते असे सांगतात. त्यामुळे अनेकवेळा गाळ काढण्याचे प्रयत्न झाले. पण, पुन्हा काही कारणाने ते काम तसेच बंद पडले होते. आता मात्र या दलदलीत दडलेला मोठा ऐतिहासिक ठेवा समोर आला आहे.

20 हजार ट्रॉली गाळ काढला

खोदकामानंतर हे तळे पुरातन असल्याचे स्पष्ट झाल्यानंतर पुरातत्व खात्यानेही जेसीबीच्या साहायाने खोदकाम न करण्याच्या सूचना दिल्या. आत्तापर्यंत सुमारे 18 ते 20 हजार ट्रॉली गाळ काढण्यात आला असून आत्तापर्यंत केवळ 25 टक्के इतकेच काम झाले आहे. अजूनही 75 टक्के काम बाकी असल्याचे गावचे सरपंच वसंत तोडकर यांनी सांगितले. त्यानुसार गावातील सर्वजन मिळून यासाठी हातभार लावताना पाहायला मिळत असून तळ्यामध्ये मंदिरही असण्याची शक्यता असल्याचे गावकऱ्यांचे म्हणणे आहे.

जिल्ह्यातील काही प्रसिद्ध मंदिर परिसरातील तळ्यांप्रमाणेच या तळ्याची रचना

कोल्हापुरातील अंबाबाई मंदिर परिसरातील मणिकर्णीका कुंड येथे सुद्धा काही दिवसांपूर्वी सुरू झालेल्या खोदकामानंतर मोठे तळे असल्याचे समोर आले होते. काही मंदिरंही खुली झाली होती. अशाच पद्धतीने ज्योतिबा मंदिर येथील यमाई तळे आणि कोटीतीर्थ तलावाचीही रचना आहे. त्यामुळे वाकरे येथे सापडलेल्या या तळ्याचे बांधकाम भोज राजाच्या काळातील असल्याचा अनेकांनी अंदाज व्यक्त केला आहे. प्रत्यक्षात बांधकाम जांभ्या दगडांमध्ये आहे त्यामुळे नेमके कोणत्या काळातील हे तळे असावे याची अनेकांना उत्सुकता लागली आहे.

हेही वाचा - शाब्बास! इचलकरंजीच्या आयजीएम रुग्णालयात रोखली आग