कोल्हापूर - कोल्हापूर जिल्हा बँकेचे निवडणूक होत असून आज (बुधवारी) मतदान सुरु पार पडले आहे. 21 पैकी 6 जागा बिनविरोध झाल्या असून या 15 जागांसाठी निवडणूक लागली आहे. राष्ट्रवादी, काँग्रेस आणि भाजपाच्या विरोधात शिवसेनेने पॅनेल केले असून यांच्यामध्ये ही लढत होत आहे. मात्र आपलाच सर्व जागांवर विजय होईल, असा दावा शिवसेना तसेच सत्ताधाऱ्यांनी सुद्धा केला आहे. ग्रामविकासमंत्री हसन मुश्रीफ, पालकमंत्री सतेज पाटील आणि शिवसेनेचे खासदार संजय मंडलिक यांनी याबाबत प्रतिक्रिया दिली आहे. शिवाय दिवासाअखेर एकूण ९९ टक्के मतदान झाल्याचे निवडणूक कार्यालयाकडून सांगण्यात आले आहे.
जिल्हा बँकेत आजपर्यंत झालेल्या उत्कृष्ट कामाची पोचपावती म्हणून सभासद मोठ्या मातांनी आपल्या पॅनेलला विजयी करतील. सकाळपासून कार्यकर्त्यांमध्ये उत्साह पाहून सर्वच जागांवर आपला विजय होईल, अशी प्रतिक्रिया पालकमंत्री सतेज पाटील यांनी माध्यमांना दिली.
'राक्षसी महत्वाकांक्षामुळे निवडणूक लागली'
जिल्हा बँक बिनविरोध व्हावी यासाठी आम्ही सर्वांनीच मनापासून प्रयत्न केले होते. मात्र शिवसेनेने 3 जागांसाठी आग्रह धरला होता. आम्ही सुद्धा दोन जागा देऊन एक स्वीकृत द्यायला तयारच होतो मात्र त्यांनी मान्य केले नाही. शेवटी राक्षसी महत्वाकांक्षामुळे ही निवडणूक लागली, अशी प्रतिक्रिया ग्रामविकासमंत्री हसन मुश्रीफ यांनी दिली आहे. शिवाय आमचा सर्वच जागांवर मोठ्या मताधिक्याने विजय होईल, असा दावा सुद्धा त्यांनी केला.
'आमचाही सर्व जागांवर विजय निश्चित'
दरम्यान, आम्ही शिवसेनेची नवी आघाडी निर्माण केली आहे. त्याला सकाळपासून भरभरून प्रतिसाद मिळत आहे. सर्वसामान्य सभासदांना सुद्धा बँकेमध्ये परिवर्तन हवे आहे अशा भावना अनेकांनी व्यक्त केल्या आहेत. त्यानुसार मतदार उत्स्फूर्तपणे प्रतिसाद देत असून आमचा सर्वच जागांवर विजय होईल, असा विश्वास शिवसेनेचे खासदार संजय मंडलिक यांनी व्यक्त केला.
जिल्हा बँकेसाठी मोठ्या चुरशीने मतदान
कोल्हापूर जिल्हा मध्यवर्ती बँकेच्या निवडणुकांची रणधुमाळी सध्या सुरू आहे. प्रचाराची तोफ शांत झाल्यानंतर आज जिल्हा बँकेसाठी मतदानाची प्रक्रिया पार पडली. जिल्ह्यात एकूण ४० मतदान केंद्रांवर मतदान पार पडले. एका केंद्रावर १५० ते २५० मतदारांना मतदान करता येईल, अशी सोय करण्यात आली होती. जिल्हा बँकेत एकूण ७ हजार ६५१ इतके मतदार आहेत. एकूण ५ गट असल्याने प्रत्येक मतदाराला ५ मतांचा अधिकार होता. प्रत्येक तालुक्यात मोठ्या चुरशीने मतदान झाले असल्याने आज दिवसाअखेर जिल्ह्यात सरासरी ९९ टक्के मतदान झाले आहे.
हेही वाचा - Jitendra Avhad OBC Statement : मंत्री जितेंद्र आव्हाडांच्या घराला पोलिसांचा मोठा बंदोबस्त; तर आव्हाड मुंबईत
