कोल्हापूर - जिल्ह्यात पुराची स्थिती आणखीनच गंभीर होत चालली आहे. पंचगंगा नदीने धोक्याची पातळी ओलांडली असून अनेक सखल भागात आणि नदीकाठच्या गावात पुराचे पाणी शिरले आहे. त्यामुळे जिल्ह्यातील ४ हजारांपेक्षा जास्त नागरिकांना सुरक्षित स्थळी हलवण्यात आले आहे.
गेल्या १० दिवसांपासून कोल्हापुरात पावसाने हाहाकार माजवला आहे. त्यामुळे राधानगरी धरणाचे सातही दरवाजे उघण्यात आले आहे. त्यामुळे धरणातून प्रतिसेकंद ११ हजार ४०० क्युसेक पाण्याचा विसर्ग भोगावती नदी पात्रात केल्या जात आहे. त्यामुळे नद्यांच्या पाणीपातळीत वाढ होत आहे. राजाराम बंधाऱ्यांची पाणीपातळी ४६.४ इंचापर्यंत पोहोचली आहे. तसेच जिल्ह्यातील एकूण ९५ बंधारे पाण्याखाली गेले आहेत. त्यामुळे कोल्हापूर जिल्हा प्रशासन आणि आपत्ती निवारण प्राधिकरण आपत्तीला तोंड देण्यासाठी सज्ज झाले आहे.
कोल्हापुरातील कुंभार गल्लीत शिरले पाणी -
शाहूपुरीतील अनेक घरांना पावसाचा फटका बसला आहे. त्यामुळे त्यांचे अंबाबाई विद्यालयात हलवण्यात आले आहे. पाणी झपाट्याने वाढत असल्यामुळे येथील कोंडा ओळ ते व्हिनस कॉर्नर रस्ता बंद झाला आहे. जयंती नाल्याचे पाणी एक ते दीड फूटापर्यंत रस्त्यावर आले आहे. शिवाय लक्ष्मीपुरीतील आपत्ती कक्षाला देखील पुराच्या पाण्याने वेडा घातला आहे. शिवाय अग्निशमन दलाच्या कार्यालयात सुद्धा पाणी शिरले आहे.
पन्हाळा तालुक्यातील तीन गावांचा संपर्क तुटला -
पन्हाळा तालुक्यातील माळवाडी पुलावरून पाणी वाहत आहे. त्यामुळे माळवाडी, तिरपन, दिगवडे या तीन गावांचा पूर्णपणे संपर्क तुटला आहे. दिगवडे येथील नवीन पुलाच्या अलीकडे पाणी आले आहे. तसेच आता माळवाडीच्या पुलावरून पाणी वाहत आहे. त्यामुळे या तीन गावांचा संपर्क पूर्णपणे तुटला आहे.
