राजकारणात गावकऱ्यांचा जातोय जीव, जालन्यात पाण्याच्या हंड्यासह महिला दुसऱ्यांदा जिल्हाधिकारी कार्यालयात

पाण्यासाठी दोन दिवसानंतर पुन्हा महिलांचा जिल्हाधिकारी कार्यालयावर मोर्चा

जालना - राजकारणातील शह-काटशहामुळे जालना तालुक्यातील पुणेगाव येथील ग्रामस्थांचा पाण्याविना जीव जाण्याची वेळ आली आहे. अवघ्या दोन दिवसांपूर्वीच या गावच्या महिलांनी डोक्यावर हांडे घेऊन जिल्हाधिकारी कार्यालयात प्रवेश केला होता. आश्वासनानंतर ते परतले, त्यानंतर फक्त पाण्याचा एक टँकर मिळाला आणि परत बंद झाला.या प्रकारामुळे त्याच महिलांनी आज पुन्हा जिल्हाधिकारी कार्यालय गाठले.

गावकऱ्यांच्या म्हणण्यानुसार गावची सत्ता ही राष्ट्रवादी काँग्रेसच्या हातात आहे आणि तालुक्याचे राजकारण हे शिवसेनेकडे आहे. पंचायत समितीचे सभापतीदेखील शिवसेनेचे आहेत त्यामुळे सरपंचाने वारंवार विनंती करूनही राजकारणाच्या शह-काटशहात हे टँकर अडकले आहे. त्यामुळे दिनांक 24 मे रोजी याच गावच्या महिलांनी डोक्यावर हांडे घेऊन थेट जिल्हाधिकारी कार्यालयात प्रवेश केला होता. मात्र, टॅंकरचे आश्वासन मिळाल्यामुळे त्या गावाकडे परतल्या. गावाकडे गेल्यानंतर एक टॅंकर आल्याचे या महिला सांगत आहेत. त्या टँकरमुळे गावाची तहान भागत नाही, त्यामुळे आज (सोमवार दि. 27) याच महिलांनी पुन्हा डोक्यावर हांडे घेऊन जिल्हाधिकारी कार्यालय गाठले आणि आपला संताप व्यक्त केला. त्यांची समजूत काढण्यासाठी जालना पंचायत समितीचे सभापती पांडुरंग डोंगरे हे देखील तेथे उपस्थित होते. काल टँकर पाठवले होते, मात्र ते रस्त्यात नादुरुस्त झाल्यामुळे पोहोचू शकले नाही, असे त्यांनी सांगितले. मात्र, त्यांच्या बोलण्यावर गावकऱ्यांचा काही विश्वास बसण्यास तयार नाही.