जालना - अंगणवाडीतील बालकांसाठी निकृष्ट दर्जाची तूर डाळ येते. हा माल उतरवण्यास नकार दिला तर खासदाराची माणसे धमकी देतात, अशी तक्रार जिल्ह्यातील अंगणवाडी सेविकांनी केली आहे.
अंगणवाडी कर्मचारी संघटनेच्यावतीने आज विविध मागण्यांसाठी जिल्हाधिकारी कार्यालयावर मोर्चा काढण्यात आला. त्यावेळी त्यांनी अंगणवाडीतील बालकांसाठी आलेली तूर डाळ ही अत्यंत निकृष्ट दर्जाची असून ती खाणे योग्य नाही, अशी तक्रार केली. त्यावेळी जिल्हा परिषदेचे उपमुख्य कार्यकारी अधिकारी केंद्रे आणि महिला व बालकल्याण अधिकारी लोंढे यांनी निकृष्ट डाळ उतरवूनच कशाला घेता? असा प्रश्न विचारला. खासदाराची माणसे आम्हाला धमकी देतात. डाळ उतरवून घ्या. वापरायची असेल तर वापरा नाहीतर फेकून द्या. काय करायचे ते करा, नाहीतर तुमचे नाव खासदाराला सांगू, अशा प्रकारच्या धमक्या दिल्या जात असल्याचे सेविकांनी सांगितले. त्यामुळे नाईलाजाने डाळ उतरून घ्यावी लागते, असे त्या म्हणाल्या.
केंद्र सरकारने जाहीर केलेली मानधन वाढ त्वरित देण्यात यावी. निवृत्त झालेल्या कर्मचाऱ्यांना सेवा समाप्तीचे लाभ मिळावेत. बचत गटांचे थकीत बिल त्वरित काढण्यात यावे. यासह इतर दहा मागण्या यावेळी करण्यात आल्या. अंबड चौफुली येथून जिल्हा परिषदेवर हा मोर्चा नेण्यात आला. त्यानंतर जिल्हा परिषदेच्या अधिकार्‍यांसोबत संघटनेच्या पदाधिकाऱ्यांनी चर्चा केली. यासोबतच अंगणवाडी सेविकांनी त्यांना दिलेल्या मोबाइल दुरुस्तीसाठी संबंधित कर्मचारी पैसे मागतात, अंगणवाडीच्या इमारती दुरुस्तीसाठी निधी नाही, अशा अनेक तक्रारी केल्या.
दरम्यान तूर डाळी संदर्भात केलेली तक्रार ही बदनापूर तालुक्याशी निगडीत असून भाजपच्या आमदाराचा हा तालुका आहे. तसेच हा पुरवठा करण्याचे काम देखील भाजपाच्या पदाधिकार्‍याचे असल्यामुळे कोणा कोणाशी भांडत बसावे? असा प्रश्नही या कार्यकर्त्यांनी केला.
