सोलापूर - काँग्रेसचे आमदार भारत भालके यांच्याविरोधात उपोषण करणाऱ्या आंदोलकाला बेदम मारहाण झाल्याची घटना घडली. संतोष माने असे मारहाण झालेल्या आंदोलकाचे नाव आहे. निवडणुकीच्या वेळी आमदार भालकेंनी दिलेली आश्वासने पूर्ण केली नाहीत, म्हणून माने मंगळवेढ्यात उपोषणाला बसले होते.
पंढरपूर-मंगळवेढा तालुक्याचे काँग्रेसचे आमदार भारत भालके यांनी निवडणुकीच्या वेळी दिलेली आश्वासने पूर्ण केली नाहीत. त्यामुळे संतोष माने यांनी त्याविरोधात मागील ३ दिवसांपासून मंगळवेढ्यात आंदोलन सुरु केले होते.
आमदार भालके यांनी निवडणुकीमध्ये दिलेल्या आश्वासनाचा बोर्ड लावून संतोष माने हे मोटारसायकलवर शहरातून फेरी मारत होते. त्यानंतर माने हे भालकेंच्या कार्यालयासमोर येऊन भाषण करत असताना त्यांच्या कार्यकर्त्यांचा वाद झाला. त्यानंतर भालकेंच्या ४ ते ५ कार्यकर्त्यांनी संतोष मानेंना बेदम मारहाण केली.
संतोष मानेला मारहाण करतानाचा व्हिडिओ व्हायरल झाला असून, त्या व्हिडिओमध्ये मारहाण केल्याचे स्पष्ट दिसत आहे. पोलीस मात्र त्यांच्यावर कोणतीही कारवाई करत नसल्याचा आरोप संतोष माने यांनी केला आहे. पोलीस आमदाराच्या दबावाला बळी पडून कोणतीही दखल घेत नसल्याचा आरोप संतोष माने यांनी केला आहे.
