जळगाव- गेल्या आठवड्याभरापासून जळगाव जिल्ह्यात पावसाने ओढ दिली आहे. याशिवाय विदर्भ आणि मध्यप्रदेशात देखील तापी नदीच्या पाणलोट क्षेत्रात पावसाने दडी मारल्याने भुसावळ तालुक्यातील तापी नदीवर असलेल्या हतनूर धरणातून पाण्याचा विसर्ग थांबविण्यात आला आहे.
तापी नदीवर असलेल्या हतनूर धरणाच्या पाणलोट क्षेत्रात गेल्या ७ ते ८ दिवसांपासून पाऊस थांबला आहे. या कारणामुळे धरणाच्या पाणलोट क्षेत्रातून येणारी पाण्याची आवक बंद झाली आहे. त्यामुळे हतनूर धरणातून २३ जूनपासून सुरू असलेला पाण्याचा विसर्ग बंद करण्यात आला आहे. विसर्गानंतर धरणाची जलपातळी २०९.५०० मीटरवर स्थिर ठेवण्यात आली आहे. पाऊस पुन्हा सुरू झाल्यानंतर धरणात पाण्याची आवक वाढली की धरणातून पुन्हा पाण्याचा विसर्ग सुरू करण्यात येईल, असे पाटबंधारे विभागाने स्पष्ट केले आहे.
यावर्षी हतनूर धरणाच्या पाणलोट क्षेत्रात २० जूनपासून चांगला पाऊस झाला होता. धरणात पाण्याची आवक वाढल्याने २३ जूनपासून पाण्याचा विसर्ग सुरू करण्यात आला होता. यामुळे धरणाचे १२ दरवाजे पूर्ण क्षमतेने उघडण्यात येऊन त्यातून २७ हजार क्युसेक एवढा पाण्याचा विसर्ग तापी नदीपात्रात सोडण्यात आला होता. पाऊस थांबल्याने आता हे १२ दरवाजे बंद करण्यात आले आहेत. विसर्गानंतर धरणाची जलपातळी २०९.५०० मीटर इतकी नोंदविण्यात आली आहे.
