जळगाव - जिल्ह्यातील कोरोनाचा संसर्ग दिवसागणिक वाढतच चालला आहे. आज (मंगळवारी) देखील तब्बल 368 नवे कोरोनाबाधित रुग्ण समोर आले. त्यामुळे जिल्ह्यातील कोरोनाच्या ऍक्टिव्ह रुग्णांची संख्या वाढून 1 हजार 566 वर गेली आहे. चिंतेची बाब म्हणजे, मंगळवारी 2 कोरोना बाधितांचा मृत्यू झाला. समाधानाची बाब म्हणजे, मंगळवारी जिल्ह्यातील 101 रुग्णांनी कोरोनावर मात केली.
जिल्हा प्रशासनाकडून मंगळवारी रात्री प्राप्त झालेल्या आकडेवारीत 368 नवे कोरोनाबाधित रुग्ण समोर आले. त्यात सर्वाधिक 164 रुग्ण हे सद्यस्थितीत जिल्ह्यातील कोरोनाचे प्रमुख हॉटस्पॉट असलेल्या एकट्या जळगाव शहरातील आहेत. त्याचप्रमाणे, चाळीसगाव तालुक्यात 55, जळगाव ग्रामीणमध्ये 34, चोपडा तालुक्यात 28, मुक्ताईनगर तालुक्यात 23, भुसावळ तालुक्यात 23 असे रुग्ण आढळले आहेत. मंगळवारी मृत्यू झालेल्यांमध्ये भुसावळ तालुक्यातील 70 वर्षीय आणि चोपडा तालुक्यातील 73 वर्षीय वृद्धाचा समावेश आहे. त्यामुळे जिल्ह्यातील कोरोनाच्या एकूण बळींची संख्या 1377 इतकी झाली आहे.
अ‌ॅक्टिव्ह रुग्ण मोठ्या संख्येने वाढताहेत-
जळगाव जिल्ह्यात सध्या ऍक्टिव्ह रुग्णांची संख्या मोठ्या प्रमाणावर वाढत चालली आहे. जिल्ह्यात सद्यस्थितीत 1 हजार 566 ऍक्टिव्ह रुग्ण आहेत. त्यात 490 रुग्ण हे लक्षणे असलेले तर 1076 रुग्णांना लक्षणे नाहीत. या रुग्णांपैकी 1024 रुग्ण हे गृह विलगीकरणात आहेत. तसेच कोविड केअर सेंटरमध्ये 52, विलगीकरण कक्षात 58, डेडिकेटेड कोविड हेल्थ सेंटरमध्ये 288 आणि डेडिकेटेड कोविड हॉस्पिटलमध्ये 202 रुग्ण उपचार घेत आहेत.
नियमांचे उल्लंघन; 'डी मार्ट' केला सील-
जळगाव शहरात कोरोनाचा प्रादुर्भाव वाढत असताना कोणत्याही प्रकारच्या प्रतिबंधात्मक उपाययोजना न केल्याने महापालिकेच्या पथकाने मंगळवारी सायंकाळी डी मार्ट सील केला. शेकडोंच्या संख्येने ग्राहकांनी गर्दी केल्याचे महापालिकेच्या प्रकाराच्या निदर्शनास आल्याने ही कारवाई करण्यात आली. उपायुक्त संतोष वाहुळे यांच्या पथकाने ही कारवाई केली.
