जळगाव - येथील बीएचआर पतसंस्थेतील अवसायकाच्या काळात झालेल्या घोटाळ्यातील मुख्य संशयित असलेला सुनील झंवर (दि. 5) पुण्याच्या विषेश न्यायालयात शरण आला आहे. शरण आल्यानंतर झंवर याने फरार घोषित होण्याचे वॉरंट रद्द करुन घेतले. दरम्यान, याच घोटाळ्यातील दुसरा मुख्य संशयित तत्कालिन अवसायक (प्रशासक) जितेंद्र कंडारे याने अटकपूर्व जामिनासाठी अर्ज दाखल केला आहे.
काय आहे प्रकरण ?
बीएचआर सोसायटीतील अवसायकाच्या काळात झालेल्या गैरव्यवहारप्रकरणी पुणे येथे दाखल असलेल्या गुन्ह्यात पुण्याच्या आर्थिक गुन्हे शाखेच्या पथकाने दि. 27 नोव्हेंबरला जळगावात छापेमारी करुन सहा जणांना अटक केली. मुख्य संशयित सुनील झंवर, अवसायक जितेंद्र कंडारे दोघे तेव्हापासून पोलिसांना हुलकावणी देत होते. पुण्याच्या न्यायालयाने झंवर व कंडारे यांना फरार घोषित करण्यासाठी 12 फेब्रुवारीला घोषणापत्र जारी केले होते. या घोषणापत्रानुसार 30 दिवसांच्या आत दोघांना न्यायालय किंवा पोलिसांना शरण येण्याचे वॉरंट काढण्यात आले होते. या वॉरंटची मुदत येणाऱ्या आठवड्यात संपुष्टात आल्यानंतर दोघांना फरार घोषित करण्यात येणार होते.
हेही वाचा - महिला दिन विशेष : पाच रुपयांत फुले विकणारी महिला झाली 'एसी फ्लॉवर शोरुम'ची मालकीण!
मुंबई उच्च न्यायालयाकडून दिलासा मिळाला
सुनील झंवर याला 2 मार्चला मुंबई उच्च न्यायालयाने अटकेपासून बचावसाठी 15 दिवसांचा दिलासा दिला होता. झंवर याने 15 दिवसांच्या आत पुण्याच्या सत्र न्यायालयात अटकपूर्व जामिनासाठी अर्ज करून, त्यावर सुनावणीसाठी मुदत देण्यात आली होती. मात्र, त्याआधीच सुनील झंवर याने 5 मार्चला पुण्याच्या न्यायालयात स्वत: हजर राहून वॉरंट रद्द करुन घेतले. झंवर याला 17 मार्चपर्यंत अटकेपासून दिलासा मिळालेला आहे.
अटकपूर्व जामिनासाठी अद्याप अर्ज नाही
पुणे न्यायालयातूनच सुनील झंवरला अटकपूर्व जामीन घेता येणार आहे. त्यासाठी मुंबई उच्च न्यायालयाने 15 दिवसांची म्हणजेच 17 मार्चपर्यंत मुदत दिली आहे. पण, झंवर याने अद्याप अटकपूर्व जामीन अर्ज दाखल केलेला नसल्याची माहिती मिळाली आहे.
हेही वाचा - जळगाव महापालिकेच्या महापौर, उपमहापौर निवडणुकीसाठी मोर्चेबांधणीला वेग; शिवसेनेच्या भूमिकेकडे लक्ष
