जळगाव - जिल्ह्यात गेल्या २ दिवसांपासून सर्वदूर जोरदार पाऊस सुरू आहे. बहुप्रतीक्षेनंतर दाखल झालेल्या पावसामुळे पिकांना नवसंजीवनी मिळाली आहे. शेतातील दुबार पेरणीचे संकट टळले आहे. त्यामुळे शेतकरीवर्गात समाधानाचे वातावरण निर्माण झाले आहे.
हतनूर धरणाचे ३६ दरवाजे अर्धा मीटरने उघडले-
जळगाव जिल्ह्यासह मध्यप्रदेशात जोरदार पाऊस पडत आहे. त्यामुळे भुसावळ तालुक्यात तापी नदीवर असलेल्या हतनूर धरणाचे ३६ दरवाजे अर्धा मीटरने उघडण्यात आले आहेत. या ३६ दरवाज्यांतून ९३६.०० क्यूसेक प्रतिसेकंद इतक्या वेगाने तापी नदीपात्रात पाण्याचा विसर्ग सोडण्यात आला आहे. तापी नदीपात्रात पाण्याचा विसर्ग सुरू असल्याने नदीकाठावरील गावांना सतर्कतेचा इशारा देण्यात आला आहे.
तोंडापूर धरण १०० टक्के भरले-
जामनेर तालुक्यातील तोंडापूर येथे खडकी नदीवर असलेले तोंडापूर धरण १०० टक्के भरले आहे. गेल्या २४ तासांत तोंडापूर धरणाच्या पाणलोट क्षेत्रात झालेल्या जोरदार पावसामुळे धरणात पाण्याची आवक वाढली. रविवारी सकाळी हे धरण १०० टक्के भरले. गेल्या वर्षी २८ जुलै रोजी धरणात शून्य टक्के साठा होता. मात्र यंदा हे धरण २८ जुलैलाच १०० टक्के भरले आहे. हे धरण भरल्यामुळे आता तोंडापूर परिसरातील शेकडो गावांचा पाणीप्रश्न निकाली निघाला आहे. त्याचप्रमाणे हजारो हेक्टर शेतीच्या सिंचनाचा प्रश्नही मार्गी लागला आहे.
