जळगाव - जिल्हा रुग्णालयात स्वॅब घेतलेल्या ३४ कोरोना संशयित व्यक्तींचे तपासणी अहवाल आज दुपारी प्राप्त झाले. यापैकी ३२ व्यक्तींचे तपासणी अहवाल निगेटिव्ह आले आहेत, तर २ व्यक्तींचे तपासणी अहवाल पॉझिटिव्ह आले आहेत. या व्यक्तींमध्ये एक २४ वर्षीय तरूण हा जळगावातील मारुतीपेठेतील असून, दुसरी व्यक्ती २१ वर्षीय महिला ही अकोला जिल्ह्यातील बाळापूर तालुक्यातील चिंचोल येथील मूळ रहिवासी आहे. ती सध्या जळगावातील समतानगर येथे राहत होती. जिल्ह्यात आतापर्यंत कोरोनाबाधित रुग्णांची संख्या ४५ इतकी झाली आहे.
जिल्ह्यात कोरोनाचा कहर सुरूच आहे. शनिवारी दुपारपर्यंत बाधित रुग्णांची संख्या ४५ वर पोहचली आहे. यापैकी १२ रुग्णांचा कोरोनाने बळी घेतला आहे. दरम्यान, शुक्रवार व शनिवारी जळगावात ३, भुसावळ २, पाचोरा २ तर अमळनेरात १ रुग्ण पॉझिटिव्ह आढळून आले आहेत. जळगाव शहरात गेल्या ४ दिवसात ६ रुग्ण आढळल्याने पॉझिटिव्ह रुग्णांची संख्या आता ८ झाली आहे. गेल्या आठवडाभरापासून जळगाव जिल्ह्यात कोरोना बाधित रुग्णांची संख्या सातत्याने वाढत आहे. अमळनेर पाठोपाठ आता भुसावळ,जळगाव व पाचोरा येथील रुग्णांचे प्रमाण वाढतच आहे. गेल्या दोन दिवसांपूर्वी रुग्णांची संख्या ३७ इतकी होती, त्यात दोन दिवसात ८ रुग्णांची भर पडून पॉझिटिव्ह रुग्णांची संख्या आता ४५ वर पोहचली आहे.
जिल्ह्यातील मृत्युदर अधिक -
जळगाव जिल्ह्यातील एकूण ४५ पॉझिटिव्ह रुग्णांपैकी १२ बाधितांचा कोरोनामुळे मृत्यू झाला आहे. यात ५० वर्षांपेक्षा जास्त वय असलेल्या रुग्णांचा सर्वाधिक समावेश आहे. असे असले तरी जिल्ह्यात कोरोना बाधितांच्या मृत्यूचे प्रमाण जास्त असल्याने चिंता व्यक्त केली जात आहे. शुक्रवारी जिल्हा रूग्णालयात २ कोरोना बाधित रुग्णांचा मृत्यू झाला. यामध्ये चोपडा तालुक्यातील अडावद येथील ५५ वर्षीय पुरुषाचा व पाचोरा येथील ५६ वर्षीय पुरुषाचा समावेश आहे. या २ जणांच्या मृत्यूमुळे जिल्ह्यातील कोरोना बाधित मृतांची संख्या १२ झाली आहे.
जिल्ह्यातील कोरोनाबाधित मृतांची संख्या अशी-
| अमळनेर - | ०६ |
| जळगाव- | ०१ |
| भुसावळ- | ०२ |
| पाचोरा- | ०२ |
| चोपडा- | ०१ |
कोरोना बाधितांची अपडेट आकडेवारी-
| एकूण पॉझिटिव्ह | मृत्यू | बरे झालेले | उपचार सुरू | |
| जळगाव | ८ | १ | १ | ६ |
| अमळनेर | २० | ६ | - | १४ |
| भुसावळ | १० | २ | - | ८ |
| पाचोरा | ५ | २ | - | ३ |
| चोपडा | १ | १ | - | - |
| मलकापूर | १ | १ | - | - |
