जळगाव - राष्ट्रवादी काँग्रेसचे नेते एकनाथ खडसे यांचा बालेकिल्ला मानला जाणाऱ्या मुक्ताईनगरात राजकीय भूकंपाची चिन्हे दिसू लागली आहेत. मुक्ताईनगर नगरपंचायतीत शिवसेनेकडून सत्तांतर घडवून आणण्यासाठी प्रयत्न सुरू आहेत. बुधवारी (26) खडसे समर्थक असलेले 4 तसेच एका अपक्ष नगरसेवकांनी मुंबईत मुख्यमंत्री उद्धव ठाकरे यांच्या उपस्थितीत आपल्या मनगटावर शिवबंधन बांधले. हा भाजपसह एकनाथ खडसेंना जबर धक्का मानला जात आहे.
राजकीय वर्तुळात खळबळ
मुक्ताईनगर नगरपंचायतीमध्ये भाजपाला स्पष्ट बहुमत मिळालेले आहे. 17 पैकी 13 नगरसेवक भाजपचे, 3 शिवसेनेचे तर 1 अपक्ष नगरसेवक आहे. अपक्ष नगरसेवकाने भाजपाला पाठींबा दिल्याने संख्याबळ 14 होऊन, याठिकाणी भाजपाने स्पष्ट बहुमत मिळवले होते. येथील नगराध्यक्षा नजमा तडवी यांच्यासह सत्ताधारी गटातील नगरसेवक हे खडसे गटाचे समर्थक आहेत. खडसेंनी भाजपा सोडून राष्ट्रवादीत जाणे पसंत केले असले; तरी हे नगरसेवक खडसेंच्या गटाचेच मानले जातात. मात्र, अलीकडच्या काळात सत्ताधारी गटात कुरबुरी सुरू होत्या. दोन दिवसांपूर्वी आमदार चंद्रकांत पाटील यांच्या निधीतून मंजूर करण्यात आलेल्या विकास कामांना बहुमताने मंजुरी देण्यात आल्याने राजकीय वर्तुळात खळबळ उडाली होती. यावरून सत्ताधारी आणि विरोधकांनी एकमेकांवर आरोप-प्रत्यारोपही केले होते.
शिवसेनेकडून 6 तर खडसेंकडून 5 नगरसेवकांच्या पक्षांतराचा दावा
नगरसेवकांच्या पक्षांतराबाबत शिवसेनेचे स्थानिक आमदार चंद्रकांत पाटील व राष्ट्रवादी काँग्रेसचे नेते एकनाथ खडसे यांच्याकडून वेगवेगळ्या प्रकारचे दावे केले जात आहेत. अपक्षासह भाजपाच्या 6 नगरसेवकांनी बुधवारी मातोश्रीवर मुख्यमंत्र्यांच्या उपस्थितीत शिवसेनेत प्रवेश केला. तर आज (27 मे) भाजपाचे अजून काही नगरसेवक शिवसेनेत दाखल होतील, असा दावा आमदार चंद्रकांत पाटील यांनी केला आहे. तर एकनाथ खडसे यांनी मुक्ताईनगरातील आपल्या निवासस्थानी पत्रकारांशी बोलताना भाजपाचे 4 आणि 1 अपक्ष अशा 5 नगरसेवकांनी पक्षांतर केल्याचे सांगितले. भाजपाचे 9 नगरसेवक हे मुक्ताईनगरातच असून, नगराध्यक्षा नजमा तडवी या देखील घरीच आहेत. त्यामुळे नगरसेवकांच्या पक्षांतराबाबत माध्यमांमध्ये आलेल्या बातम्या चुकीच्या असल्याचेही खडसेंनी सांगितले.
दरम्यान, भाजपच्या अजून 4 नगरसेवकांनी शिवसेनेत प्रवेश केला तर शिवसेनेचे संख्याबळ वाढून भाजपावर नगरपंचायत गमावण्याची वेळ येण्याची शक्यता आहे.
अपात्रतेची कारवाई टाळण्यासाठी नगरसेवकांचा खटाटोप- खडसे
भाजपाच्या नगरसेवकांच्या पक्षांतराबाबत बोलताना एकनाथ खडसे म्हणाले की, 'मुंबईत भाजपाच्या 4 तर 1 अपक्ष नगरसेवकाने शिवसेनेत प्रवेश केल्याचे दिसत आहे. यातील 3 नगरसेवकांनी अतिक्रमण आणि खोटा दाखला सादर केल्याने त्यांच्यावर अपात्रतेची कारवाई प्रस्तावित आहे. जिल्हाधिकाऱ्यांकडे याबाबत 1 तारखेला सुनावणी होणार आहे. त्यांच्यातील अन्य एका महिला नगरसेविकेवर 4 अपत्य असल्याने यापूर्वीच अपात्रतेची कारवाई झाली आहे. शिवसेनेत प्रवेश करून अपात्रतेची कारवाई टाळण्यासाठी नगरसेवकांचा खटाटोप सुरू आहे. कदाचित त्यांना कारवाईला स्टे मिळवून देण्याचे आश्वासन मिळाले असेल. पक्षांतर बंदी कायद्यानुसार भाजपा न्यायालयात नगरसेवकांच्या विरोधात दाद मागणार आहे, असे भाजपाच्या पदाधिकाऱ्यांनी आपल्याला सांगितले आहे'.
नगरसेवक भाजपाचे मग खडसेंनी प्रतिक्रिया देण्याचे कारण काय? -आमदार पाटील
भाजपाच्या नगरसेवकांना गळाला लावून शिवसेना मुक्ताईनगर नगरपंचायतीत सत्तांतर घडवून आणण्यासाठी प्रयत्नशील आहे. या माध्यमातून पुन्हा एकमेकांचे कट्टर राजकीय प्रतिस्पर्धी असलेले आमदार चंद्रकांत पाटील व एकनाथ खडसे यांच्यात वर्चस्वाची लढाई रंगण्याची चिन्हे दिसत आहेत. 'पक्षांतर करणारे नगरसेवक हे भाजपाचे आहेत. तर खडसे आता राष्ट्रवादीत आहेत. मग अशा परिस्थितीत खडसेंनी या विषयावर प्रतिक्रिया देण्याचे कारण काय?', असा सवाल आमदार चंद्रकांत पाटलांनी उपस्थित केला आहे.
शिवसेनेच्या समर्थकांकडून फटाक्यांची आतषबाजी
भाजपाच्या नगरसेवकांनी मुंबईत शिवसेना प्रवेश केल्यानंतर मुक्ताईनगरात शिवसेनेच्या समर्थकांनी फटाक्यांची आतषबाजी करत जल्लोष केला. मुक्ताईनगर नगरपंचायतीवर आता शिवसेनेचा भगवा फडकणार आहे, असा विश्‍वास यावेळी शिवसेनेच्या कार्यकर्त्यांनी व्यक्त करत जोरदार घोषणाबाजी केली.
हेही वाचा - लसीकरणाची निविदा प्रक्रिया टक्केवारीत अडकली का? भाजप प्रवक्ते केशव उपाध्याय यांचा प्रश्न
