जळगाव - भाईचंद हिराचंद रायसोनी अर्थात बीएचआर पतसंस्थेच्या अनेक मालमत्ता भाजपचे माजीमंत्री गिरीश महाजन व त्यांच्या संबंधित लोकांनी कवडीमोल भावात खरेदी केल्या आहेत. सुरुवातीला या सर्व मालमत्ता मित्रांच्या नावे घेण्यात आल्या, आता त्या स्वतःच्या नावावर करण्याचा सपाटा सुरू आहे. दोन महिन्यांपूर्वीच एक 25 कोटी रुपयांची मालमत्ता त्यांनी अवघ्या दीड कोटी रुपयांत पत्नी साधना महाजन यांच्या नावे करून घेतली, असा खळबळजनक आरोप जामनेर नगरपालिकेचे माजी नगराध्यक्ष पारस ललवाणी यांनी केला.
पारस ललवाणी यांनी रविवारी सायंकाळी जामनेरात आपल्या निवासस्थानी पत्रकार परिषद घेतली. यावेळी ते बोलत होते. यावेळी ललवाणी यांनी बीएचआर पतसंस्थेतील गैरव्यवहार, जामनेरातील शिक्षण संस्था हडपण्याच्या प्रकरणासह गिरीश महाजन यांनी आपल्या राजकीय विरोधकांवर कशा पद्धतीने खोटे गुन्हे दाखल करून छळ केला, याची माहिती दिली. ललवाणी यांनी यावेळी जामनेर नगरपालिकेत अनेक गैरव्यवहार झाल्याचे सांगत गिरीश महाजन यांच्यावर अनेक खळबळजनक आरोप केले.
बीएचआर'च्या मालमत्ता गिरीश महाजनांनी लाटल्या जळगावातील मराठा विद्याप्रसारक संस्थेच्या वादाच्या प्रकरणात ऍड. विजय पाटील यांनी दाखल केलेल्या तक्रारीवरून गुन्हा दाखल झाल्यानंतर भाजपचे माजीमंत्री गिरीश महाजन यांच्या अडचणी वाढण्याची चिन्हे दिसू लागली आहेत. काल (शनिवारी) ऍड. विजय पाटील यांनी पत्रकार परिषद घेऊन गिरीश महाजन यांना प्रत्युत्तर दिले होते. त्यानंतर आज पारस ललवाणी यांनी पत्रकार परिषद घेऊन गिरीश महाजन यांना लक्ष्य केले. ललवाणी म्हणाले की, बीएचआर पतसंस्थेचा गैरव्यवहार तसेच मराठा विद्याप्रसारक संस्थेच्या वादाशी आपला संबंध नसल्याचे गिरीश महाजन यांनी सांगितले आहे. पण, ही वस्तुस्थिती नाही. बीएचआर पतसंस्थेच्या अनेक मालमत्ता गिरीश महाजन व त्यांच्या संबंधित लोकांनी खरेदी केल्या आहेत. दोन महिन्यांपूर्वीच एक 25 कोटी रुपयांची मालमत्ता त्यांनी अवघ्या दीड कोटी रुपयांत पत्नीच्या नावे घेतली. मग बीएचआरशी आपला संबंध नाही हे ते कसे म्हणू शकतात, असा प्रश्न उपस्थित करून ललवाणी म्हणाले, गिरीश महाजन यांनी जामनेरात अनेक जमिनी कवडीमोल भावात घेतल्या आहेत. अनेक जमिनीचे ते मालक आहेत. ही माया कशी जमवली? याची चौकशी व्हायला हवी, अशी मागणी त्यांनी केली.
आमच्या मागे कुणीही नाही-
गिरीश महाजन यांनी तक्रारदारांच्या पाठीमागे कुणीतरी दुसरे असल्याचा आरोप केला होता. मात्र, आमच्या मागे कुणीही नाही. आम्ही स्वतः तक्रारीसाठी पुढे आलो आहोत, असे ललवाणी यांनी स्पष्ट केले. जामनेर एज्युकेशन संस्था बळकावण्यासाठी गिरीश महाजन यांनी संस्थेच्या संचालकांवर खोटे गुन्हे दाखल केले. प्रत्येक संचालकाचा छळ केला, धमक्या दिल्या. प्रशासनातील अधिकारी, पोलिसांकडून दबाव आणला, दमदाट्या केल्या. एका महिलेवर महावीर जयंतीच्या दिवशी खोटा गुन्हा दाखल करून रात्रभर कोठडीत डांबले, असा आरोपही ललवाणी यांनी केला. दरम्यान, पारस ललवाणी यांनी देखील ऍड. विजय पाटील यांच्यासारखंच पत्रकार परिषदेत एक सीडी आणि पेन ड्राईव्ह दाखवत गिरीश महाजन व त्यांच्या सहकाऱ्यांचे अनेक पुरावे आमच्याकडे असल्याचा गौप्यस्फोट केला. मात्र, या सीडी आणि पेन ड्राईव्हमध्ये नेमकं काय आहे, हे स्पष्टपणे सांगण्यास त्यांनी नकार दिला. वेळ आल्यानंतर सीडी आणि पेन ड्राईव्हमधील माहिती जनतेसमोर येईल, एवढं सांगून त्यांनी अधिक बोलणे टाळले.
बीएचआरच्या मालमत्ता घेणाऱ्यांच्या घरांवर मोर्चा काढणार-
अनेक ठेवीदारांचे बीएचआरकडे 700 कोटी रुपये घेणे बाकी आहे. परंतु, या सार्‍या मंडळीने गैरव्यवहार करत बीएचआरच्या एक हजार कोटींच्या मालमत्ता कवडीमोल दरात खरेदी केल्या आहेत. या मालमत्तांची नियमानुसार विक्री झाली असती तर ठेवीदारांना त्यांचे हक्काचे पैसे व्याजासह परत मिळाले असते. ठेवीदारांना त्यांच्या ठेवी परत मिळाव्यात, म्हणून आपण मोठे आंदोलन उभारणार आहोत. या आंदोलनात ठेवीदारांनी आपल्याला साथ दिली तर आपण बीएचआरच्या मालमत्ता खरेदी करणाऱ्यांच्या घरांवर मोर्चा काढू, त्यांच्या घरासमोर उपोषणाला बसू आणि ठेवीदारांना न्याय मिळवून देऊ, असेही ललवाणी यांनी यावेळी जाहीर केले.
