जळगाव - शहर स्वच्छतेसाठी महापालिका प्रशासनाने वॉटर ग्रेस कंपनीला ठेका दिला आहे. मात्र, ठेका दिल्यावर 15 दिवसातच स्वच्छतेचा बोजवारा उडाला. त्यामुळे वॉटर ग्रेस कंपनीचा ठेका रद्द करावा, या मागणीवरून गुरुवारी पार पडलेल्या महासभेत सत्ताधारी भाजप आणि सेनेत जोरदार खडाजंगी झाली. मात्र, 15 दिवसातच गुणवत्तेची फुटपट्टी लावून मक्तेदाराकडून ठेका काढून घेणे योग्य होणार नाही, अशा शब्दात भाजपने मक्तेदाराची पाठराखण करत सेनेचा विरोध झुगारुन लावला.
या सभेला महापौर सीमा भोळे, उपमहापौर डॉ. अश्‍विन सोनवणे, आयुक्त डॉ. उदय टेकाळे, नगरसचिव सुनील गोराणे आदी उपस्थित होते. सभेच्या सुरुवातीलाच सेनेच्या सदस्यांनी शहरातील स्वच्छतेविषयी लक्षवेधी मांडली. शहरात स्वच्छता करण्यासाठी वॉटर ग्रेस कंपनीला ठेका देऊन काही एक उपयोग झालेला नाही. जागोजागी कचरा साचला आहे. त्यामुळे शहरवासीयांच्या आरोग्याचा प्रश्न गंभीर झाला आहे.
मक्तेदार स्वच्छतेचे काम योग्यरित्या पार पाडत नसल्याने महापालिकेचे कोट्यवधी रुपये पाण्यात गेले आहेत. वॉटर ग्रेसऐवजी अन्य दुसऱ्या कंपनीला स्वच्छतेचा ठेका द्यावा, अशी मागणी सेनेच्या सदस्यांनी केली. मात्र, भाजपने मक्तेदाराची पाठराखण करत सेनेची मागणी धुडकावून लावली.
शहरातील स्वच्छतेसाठी दिलेला एकमुस्तचा ठेका शहराला फायदेशीर आहे. ठेक्‍याला सुरुवात होऊन फक्त 15 दिवस झाले असून मक्तेदार काहीएक कामाचा नाही, असे म्हणता येणार नाही. मक्तेदाराकडून ज्या चुका झाल्या आहेत; त्याबाबत त्यांच्याकडून दंड आकारला आहे. त्यांना त्यांची यंत्रणा कार्यान्वित करण्यासाठी वेळ द्यावा लागणार आहे. असा मुद्दा मांडत भाजपने सेनेला प्रत्युत्तर दिले.
भाजपच्या भूमिकेला सेनेकडून जोरदार विरोध -
स्वच्छतेसाठी एकमुस्तचा ठेका देण्याची प्रशासनाने घाई केली आहे. मक्तेदाराकडून कचऱ्याचे वजन वाढविण्याचा प्रकार उघड झालेला आहे. त्यामुळे तो शहरात कितपत स्वच्छता करेल, याबाबत सांशकता आहे. हा ठेका रद्द करून महापालिकेच्या यंत्रणेकडून शहरात स्वच्छता करावी, अशी मागणी सेनेच्या सदस्यांनी करत भाजपच्या भूमिकेला जोरदार विरोध केला. यावेळी भाजप आणि सेनेचे सदस्य समोरासमोर आल्याने शाब्दिक वाद वाढला. मात्र, भाजपच्या बहुमतासमोर सेनेचा विरोध टिकाव धरू शकला नाही.
