जळगाव - कोरोनाच्या लसीबाबत अद्यापही अनिश्चितता आहे. कोरोनाचा प्रतिकार करू शकेल, अशी लस विकसित करण्याची प्रक्रिया सुरू आहे. मध्यंतरी प्लाझ्मा थेरेपीचा पर्याय समोर आला होता. परंतु, या थेरेपीचा हवा तसा रिझल्ट न मिळाल्याने त्या विषयी सुरुवातीपासून संभ्रम होता. याच अनुषंगाने आता प्लाझ्मा थेरेपीबाबत पुढील निर्देश येईपर्यंत याची क्लिनिकल ट्रायल करू नये, असे निर्देश आरोग्य विभागाने जारी केले आहेत, अशी माहिती शासकीय वैद्यकीय महाविद्यालय व रुग्णालयाचे अधिष्ठाता डॉ. जयप्रकाश रामानंद यांनी 'ईटीव्ही भारत'शी बोलताना दिली.
प्लाझ्मा थेरेपीबाबत पुढील निर्देश येईपर्यंत याची क्लिनिकल ट्रायल करू नये, असे निर्देश स्थानिक कोविड रुग्णालयाला प्राप्त झाले आहेत. दोन दिवसापूर्वीच राज्याच्या आरोग्य विभागाच्या अधिकाऱ्यांसोबत झालेल्या व्हिडिओ कॉन्फरन्समध्ये वरिष्ठ पातळीवरून प्लाझ्मा थेरेपीच्या मुद्यावर चर्चा झाल्याची माहिती आहे.
जळगावातही रुग्णांवर झाली प्लाझ्मा थेरेपीची ट्रायल -
जळगाव येथील जिल्हा कोविड रुग्णालयात प्लाझ्मा थेरेपीची कोरोनाग्रस्त रुग्णांवर ट्रायल झाली होती. प्लाझ्मा थेरेपीमुळे एक मध्यम तर एक गंभीर रुग्ण बरे होऊन घरी गेल्याची माहिती आहे. मात्र, राज्यात अन्यत्र प्लाझ्मा थेरेपीचे चांगले परिणाम समोर आलेले नव्हते. त्यामुळे, बऱ्याच दिवसांपासून याबाबत संभ्रमाचे वातावरण होते. शिवाय सरसकट प्रत्येक रुग्णाला तो देता येत नव्हता. याचे निकष तपासून डॉक्टर निर्णय घेत होते. सुरुवातीला प्लाझ्मा दान करणाऱ्यांचे प्रमाणही अगदीच नगण्य होते. अनेक महिने प्लाझ्मा दान करणाऱ्यांची संख्या ही तेराच्या पुढे गेलेली नव्हती.
दोन महिन्यांपूर्वी मिळाली होती मंजुरी -
दरम्यान, दोन महिन्यांपूर्वी सुरुवातीला ऑफ लेबल आणि नंतर क्लिनिकल ट्रायल अशा पद्धतीने प्लाझ्मा थेरेपीला मंजुरी देण्यात आली होती. आगामी काळात रुग्णसंख्या वाढीची शक्यता वर्तवण्यात येत असताना आता अचानक पुढील निर्देशापर्यंत ती बंद करण्याच्या सूचना देण्यात आल्याची माहिती डॉ. जयप्रकाश रामानंद यांनी दिली.
काय आहे प्लाझ्मा थेरेपी?
आपल्या शरीरामधील रक्ताचे 4 मुख्य घटक लाल रक्तपेशी, पांढऱ्या रक्तपेशी, प्लेटलेट्स आणि प्लाझ्मा असतात. प्लाझ्मा हे रक्ताचा द्रव भाग आहे. प्लाझ्माच्या साहायाने आवश्यकतेनुसार शरीरात अँटिबॉडीज तयार केल्या जातात. कोरोनाच्या आक्रमणानंतर आपले शरीर विषाणूंविरुद्ध लढायला सुरुवात करते. प्लाझ्माच्या साहायाने तयार अँटिबॉडीज याला लढा देतात. शरीरात पुरेशा अँटिबॉडीज बनल्या तर कोरोनाचा नायनाट होऊ शकतो. रुग्ण बरा झाल्यावर शरीरातील अँटिबॉडीज प्लाझ्मासह डोनेट करता येतात.
कोरोना संसर्ग झाल्यावर एखादा रुग्ण बरा झाल्यावर त्याच्या शरीरात अँटिबॉडीज विकसित होतात. या अँटिबॉडीज त्याला बरे होण्यासाठी साहाय्य असतात. जी व्यक्ती रक्तदान करते त्याचा रक्तामधून प्लाझ्मा काढला जातो आणि जेव्हा प्लाझ्मामध्ये आढळणारे अँटिबॉडीज आजारी माणसापर्यंत पोहोचतात त्याने आजारी माणसाला बरे होण्यास मदत होते. डोनरची कोरोनाची चाचणी निगेटिव्ह आल्याच्या दोन आठवड्यानंतर ती व्यक्ती प्लाझ्मा दान करू शकते.
हेही वाचा - जळगाव जिल्ह्यातील शाळा 7 डिसेंबरपर्यंत राहणार बंद; कोरोनाचा वाढता संसर्ग पाहता प्रशासनाचा निर्णय
