जळगाव - कोरोनाच्या पार्श्वभूमीवर कृषी उत्पन्न बाजार समित्यांमध्ये दहापेक्षा जास्त जणांना प्रवेश न देणे, तसेच टप्प्याटप्प्याने व्यवहार करण्याचे आदेश आहे. असे असतानाही कृषी उत्पन्न बाजार समित्यांमध्ये सोशल डिस्टंसिंगचे पालन होत नसल्याचे दिसून आले. त्यामुळे जिल्ह्यातील जळगाव, अमळनेर, भुसावळ व चाळीसगाव येथील कृषी उत्पन्न बाजार समित्यांचे व्यवहार पुढील आदेश येईपर्यंत पूर्णपणे बंद ठेवण्याचे आदेश जिल्हाधिकारी डॉ. अविनाश ढाकणे यांनी दिले आहे.
कोरोनाच्या पार्श्वभूमीवर करण्यात येणाऱ्या उपाययोजनांतर्गत बाजार समित्यांमधील गर्दी कमी व्हावी, यासाठी जिल्हाधिकारी डॉ. ढाकणे यांनी २० मार्च रोजी कृषी उत्पन्न बाजार समित्यांमध्ये एका वेळी दहा जणांपेक्षा जास्त जणांना प्रवेश नसावा. टप्प्या-टप्प्याने व्यवहार करण्याचे आदेश दिले होते. मात्र. असे असताना बाजार समित्यांमध्ये दररोज मोठी गर्दी होत होती. शिवाय या ठिकाणी सोशल डिस्टंसिंगचे पालनही होत नसल्याचे समोर आले होते.
हेही वाचा... ईटीव्ही भारत विशेष : जळगाव जिल्ह्यासाठी खते आणि बियाण्यांची मुबलक प्रमाणात उपलब्धता
हे प्रकार सुरूच राहिल्याने जिल्हाधिकारी डॉ. ढाकणे तसेच पोलीस अधीक्षक डॉ. पंजाबराव उगले यांनी जळगाव बाजार समितीमध्ये भेट देऊन पाहणी केली. या ठिकाणी नियमांचे पालन होत नसल्याचे दिसून आल्याने पाच व्यापाऱ्यांचे परवानेदेखील रद्द केले. तरी देखील बाजार समित्यांमध्ये धान्य, भाजीपाला, फळे यांच्या खरेदी व विक्रीसाठी गर्दी कायम होती. त्यामुळे २० मार्च रोजीच्या आदेशाचे व सोशल डिस्टंसिंगचे पालन होत नसल्याने जळगावसह अमळनेर, भुसावळ, चाळीसगाव येथील बाजार समित्यांचे व्यवहार पुढील आदेशापर्यंत पूर्णपणे बंद ठेवण्याचे आदेश जिल्हाधिकारी डॉ. ढाकणे यांनी दिले. या आदेशाचे उल्लंघन झाल्यास कारवाई करण्याचा इशाराही देण्यात आला आहे.
