जळगाव - रेमडेसिवीर इंजेक्शनचा काळाबाजार केल्याप्रकरणी जिल्ह्यातील भुसावळ शहरात असलेल्या ओम पॅथॉलॉजी लॅबच्या मालकासह दोघांना पोलिसांनी अटक केली आहे. हे दोघे अव्वाच्या सव्वा दरात रेमडेसिवीर इंजेक्शन विक्री करत होते. विशाल शरद झोपे (वय 28, रा. भुसावळ) आणि गोपाल नारायण इंगळे (वय 18, रा. मानमोडी, ता. बोदवड) अशी अटक केलेल्या संशयित आरोपींची नावे आहेत. विशाल झोपे हा लॅबचा मालक आहे.
असे आले जाळ्यात
राज्यभर रेमडेसिवीर इंजेक्शनचा तुटवडा जाणवत आहे. त्यामुळे या इंजेक्शनची साठेबाजी आणि काळाबाजार होत आहे. अशा परिस्थितीत बुधवारी (आज) एका अज्ञात व्यक्तीने विशाल झोपे व गोपाल इंगळे या दोघांकडून एमआरपीपेक्षा जास्त किंमतीने रेमडेसिवीर इंजेक्शन विकत घेतले. त्यानंतर त्या व्यक्तीने ही माहिती भुसावळ पोलिसांना दिली. त्यानुसार पोलिसांनी लागलीच ओम पॅथॉलॉजी लॅबवर छापा टाकला. त्यात दोघांना पकडण्यात आले. त्यांच्याकडे दोन वेगवेगळ्या कंपनीचे 5 रेमडेसिवीर इंजेक्शन मिळून आले. हे इंजेक्शन त्यांनी दुसऱ्या व्यक्तीकडून 20 हजार रुपयांत घेतले होते. हेच इंजेक्शन ते नफा कमवण्यासाठी 20 हजारांपेक्षा अधिक किंमतीत विकत होते. अशी कबुली त्यांनी पोलिसांना दिली आहे.
विशाल व गोपाल या दोघांनी आतापर्यंत 30 ते 35 रेमडेसिवीर इंजेक्शन काळ्याबाजारात विकले आहेत. पोलिसांच्या प्राथमिक तपासात हे उघड झाले आहे. या दोघांच्या मागे सूत्रधार कोण आहे, रेमडेसिवीरचा काळाबाजार करणारी टोळी जिल्ह्यात सक्रिय आहे का? याचा तपास पोलीस करत असल्याची माहिती प्रशिक्षणार्थी पोलीस अधिकारी अर्चित चांडक यांनी दिली आहे. अटकेतील दोघांवर बाजारपेठ पोलीस ठाण्यात गुन्हा दाखल करण्यात आला आहे.
लॅब केली सील
दरम्यान, या कारवाईनंतर नगरपालिका प्रशासनाने ओम पॅथॉलॉजी लॅब तत्काळ सील केली आहे. नगरपालिकेचे कर्मचारी ही कारवाई करत असताना लॅबमध्ये काम करणाऱ्या एका तरुणीने कर्मचाऱ्यांसोबत हुज्जत घातली होती.
हेही वाचा-बीड : स्वाराती रुग्णालयात 6 जणांचा मृत्यू; नातेवाईकांच्या आरोपांचे रुग्णालय प्रशासनाकडून खंडण
