जळगाव - गेल्या अनेक दिवसांपासून सुरु असलेली ईडी आणि सीडी बाबतची चर्चा आता जुनी झाली आहे. मात्र, आता ईडी लागली असल्याने त्यांनी आता सीडी दाखवावी, असे थेट आव्हान भाजप नेते आमदार गिरीश महाजन यांनी राष्ट्रवादीचे नेते एकनाथ खडसे यांना दिले आहे.
हेही वाचा - महाराष्ट्राच्या राज्यपालांमुळे उत्तराखंडमध्ये तापले राजकारण, जाणून घ्या नेमके कारण
भाजप नेते गिरीश महाजन व राष्ट्रवादीचे नेते एकनाथ खडसे यांच्यात मागील वर्षापासून ईडी व सीडीच्या मुद्द्यावरून जुगलबंदी सुरु आहे. काल एकनाथ खडसे यांनी माझी ईडीची चौकशी सुरु आहे. त्यामुळे मी म्हटल्यानुसार योग्य वेळ आल्यावर सीडी लावणार असल्याचे वक्तव्य केले होते. त्याच अनुषंगाने आज भाजप नेते गिरीश महाजन यांनी खडसेंवर पलटवार केला आहे. आज सोमवारी जिल्हा नियोजन समितीची बैठक पालकमंत्री गुलाबराव पाटील यांच्या अध्यक्षतेखाली घेण्यात आली. या बैठकीनंतर गिरीश महाजन यांनी पत्रकारांशी संवाद साधला. तेव्हा ते बोलत होते.
- आता समजेल योग्य वेळ कोणाची येते ते?
यावेळी पुढे बोलताना गिरीश महाजन म्हणाले की, ईडी अन सीडीचा विषय आता बोअर झाला आहे, आमची ईडी तर चालली आहे, तुमची सीडी तर दाखवा. सीडी बाहेर येईल का नाही ते नेत्यांनाच विचारा? ते म्हणताहेत चौकशी करताहेत, तपासताहेत त्यामुळे आता समजेल योग्य वेळ कोणाची येते ते? अशा शब्दात महाजन यांनी खडसेंचे नाव न घेता त्यांना टोला लगावला.
- तर मंदिरे आम्ही उघडणार-
कोरोनाचा प्रादुर्भाव कमी झाला आहे. त्यामुळे आता अनेक निर्बंध शिथील झाले आहेत. राजकीय कार्यक्रम मोठ्या संख्येने होत आहेत, तसेच इतर राज्यांमध्ये देखील मंदिर उघडली गेली आहेत. मात्र राज्य शासनाकडून अजूनही मंदिरे उघडण्याबाबत कोणताही निर्णय घेतला जात नसल्याने सोमवारी भाजपकडून मंदिरे उघडण्यासाठी आंदोलन करून राज्य सरकारचे लक्ष वेधण्याचा आम्ही प्रयत्न केला आहे. राज्य सरकारने आता मंदिरे उघडली नाहीत तर आम्ही ती मंदिरे उघडू, असा इशारा गिरीश महाजन यांनी सरकारला दिला आहे.
हेही वाचा - जळगावात एकनाथ खडसे भाजपवर बरसले; ईडी चौकशीच्या मुद्द्यावरून व्यक्त केली मनातील खदखद!
