हिंगोली - खंडाळा परिसरात वाघाने 4 गाईवर हल्ला केल्याची घटना बुधवारी रात्रीच्या सुमारास घडली. वनविभागाने वाघाचे लोकेशन तपासले असता खंडाळा परिसरात वाघ असल्याचे निष्पन्न झाले आहे. त्यामुळे परिसरातील नागरिकांमध्ये भितीचे वातावरण पसरले आहे.
खंडाळा येथे ३ गाईंवर, तर कलगाव येथे एका गाईवर वाघाने हल्ला केला. खंडाळा येथील राम किसन गायकवाड आणि शिवाजी गायकवाड या शेतकऱ्यांना वाघाचे समोरासमोर दर्शन झाले. त्यानंतर त्यांनी आरडाओरड करत पळ काढला. दरम्यान, तुरीच्या ओळीत बसलेला वाघ तेथून उठला आणि समोर जाऊन एका गाईवर हल्ला केल्याचे शेतकऱ्यांनी सांगितले. त्यामुळे शेतकरी शेतात जाण्यास घाबरत आहेत. वन विभागाला वाघ आल्याची माहिती कळताच विभागीय वनाधिकारी केशव वाबळे यांनी त्यांच्या पथकासह स्वतः खंडाळा आणि कलगाव शिवारात धाव घेऊन नागरिकांना दिलासा दिला आहे. तसेच गाईंची योग्य ती नुकसान भरपाई देणार असल्याचे केशव वाबळे यांनी सांगितले.
हा वाघ यवतमाळच्या वनपरिक्षेत्रातील असून त्याची वन विभागाकडे नोंद सुद्धा आहे. एवढेच नव्हे तर वाघाच्या गळ्यामध्ये असलेल्या रेडिओ कॉलरनुसार त्याचे लोकेशन हे दिवसातून दोन वेळा ट्रेस केले जाते. त्यानुसार संबंधित वन विभागाला त्याची माहिती कळविली जात आहे.
वनविभागाने वाघाने फस्त केलेल्या गाईजवळ ट्रॅप कॅमेरे बसविले आहेत. त्या परिसरावर वनविभाग बारकाईने लक्ष ठेवून आहे. सध्या सोयाबीनचा हंगाम जोरात सुरू आहे. त्यातच आज पावसाने उघडीप दिली असल्याने शेतकरी कामाला लागले आहेत. मात्र, वाघाच्या दहशतीमुळे शेतकरी शेतात जाण्यास घाबरत आहेत.
