हिंगोलीत महिलांच्या सुरक्षेसाठी शिवसेनेचा 'तु्म्ही हाक द्या, मी साथ देईन' उपक्रम

महिलांच्या सुरक्षेचा प्रश्न ऐरणीवर आला आहे. यामुळेच महिलांच्या संरक्षणार्थ पोलिसांसोबत शिवसेनाही रस्त्यावर उतरली आहे. दरम्यान, 'तुम्ही हाक द्या, मी साथ देईन' हा उपक्रम हाती घेतल्याचे कळमनुरी विधानसभा मतदारसंघाचे आमदार संतोष बांगर यांनी सांगितले आहे.

हिंगोली - देशभरासह संपूर्ण महाराष्ट्रात गेल्या वर्षभरात महिला अत्याचारांमध्ये वाढ झाली आहे. त्यातच हैदराबाद येथील पशुवैद्यकीय डॉक्टर महिलेवर चार नराधमांनी बलात्कार करुन तिला जाळून टाकले. या घटनेने संपूर्ण देश हादरून गेला. देशभरात संतापाची लाट पसरली. तसेच, जालना येथील 13 वर्षीय बालिकेवर आरोपींनी हिंगोली जिल्ह्यातील सेनगाव तालुक्यात ऐका शेतात 23 दिवस अत्याचार केला. या वरूनच महिलांच्या सुरक्षेचा प्रश्न ऐरणीवर आला आहे. यामुळेच महिलांच्या संरक्षणार्थ पोलिसांसोबत शिवसेनाही रस्त्यावर उतरली आहे. दरम्यान, 'तुम्ही हाक द्या, मी साथ देईन' हा उपक्रम हाती घेतल्याचे कळमनुरी विधानसभा मतदारसंघाचे आमदार संतोष बांगर यांनी सांगितले आहे.

दिवसेंदिवस महिलांची सुरक्षा विषय ऐरणीवर आल्यामुळे गंभीर घटना घडत आहेत. वाढत्या घटनामुळे महिलांना रस्त्यावर एकटे फिरणे देखील कठीण झाले आहे. पोलीस त्यांचे काम करत आहेत. मात्र या घटनांमध्ये घट होत नसल्याचे चित्र आहे. यामुळे मागासलेला जिल्हा म्हणून ओळख असलेल्या हिंगोली जिल्ह्यात शिवसेनेच्या वतीने उपक्रम हाती घेण्यात आला आहे. आमदार संतोष बांगर यांनी आपल्या शिवसैनिकांना महिलांसाठी 24 तास सतर्क राहण्याचा आदेश दिला आहे. कोणत्याही महिलेला काहीही अडचण आल्यास त्या महिलेच्या मदतीसाठी शिवसैनिक आवर्जून धावून जाईल, तसेच जिल्ह्यात लावण्यात येणाऱ्या जनजागृती फलकावर माझा स्वतः चा तर नंबर असेलच पण त्यावर टाकण्यात येणाऱ्यांचे नंबर हे 24 तास सतर्क राहणार असल्याची माहिती त्यांनी दिली आहे. दरम्यान, फलकावर दिल्या जाणाऱ्या संपर्क क्रमांकावर फोन करून अडचण कळवल्यास शिवसैनिक त्या महिलेला घरापर्यंत सुखरूप सोडवणार आहेत.

हेही वाचा - 'सैराट'ची पुनरावृत्ती; आंतरजातीय प्रेमसंबंधाला विरोध करत बापानेच केले मुलीच्या शरीराचे तुकडे

या उपक्रमासाठी वाहने देखील उपलब्ध करून ठेवण्यात आली आहेत. विशेष म्हणजे राज्यात उद्धव ठाकरे यांच्या नेतृत्वात सरकार स्थापन झाले आहे. राज्याचे मुख्यमंत्री म्हणून शिवसेना पक्षप्रमुख उद्धव ठाकरे कारभार सांभाळत आहेत. असे असताना चक्क सेनेच्या आमदारांना महिलांचे संरक्षण करण्यासाठी रस्त्यावर उतरावे लागत असल्याचे चित्र आहे. त्यामुळे हा विषय चर्चेचा बनला आहे. आता या उपक्रमाला कितीप्रमाणात साथ मिळेल, हे पाहण्यासारखे असणार आहे.

शिवसेनेच्यावतीने या उपक्रमाअंतर्गत जिल्ह्यात ठिकठिकाणी फलकबाजी करण्यात येणार आहे. मात्र शिवसेनेच्या या उपक्रमाची कोणतीही कल्पना पोलीस प्रशासनाला नसल्याचे पोलीस अधीक्षक योगेश कुमार यांनी सांगितले आहे.

हेही वाचा - चारित्र्याच्या संशयावरुन पत्नीची हत्या, 9 दिवस फ्रीजमध्ये ठेवला मृतदेहाचा अर्धा भाग