हिंगोलीमध्ये एका दिवसाच्या विश्रांतीनंतर पाऊस पुन्हा सक्रिय

हिंगोली जिल्ह्यात गेल्या काही दिवसांपासून सुरू असलेल्या पावसाने एक दिवसाची विश्रांती घेतली होती. मात्र आज (गुरुवार) पाऊस पुन्हा सक्रिय झाला आहे. मात्र जिल्ह्यातून वाहणाऱ्या कयाधू नदी पत्रातील पाणीसाठ्यामध्ये अजून वाढ झालेली नाही.

हिंगोली - एका दिवसाच्या विश्रांतीनंतर पावसाने जिल्ह्यात पुन्हा जोरदार हजेरी लावली. हिंगोली जिल्ह्यात मागील पाच ते सहा दिवसांपासून संततधार सुरू होती. आत्तापर्यंत जिल्ह्यात सरासरीच्या 26.40 टक्के पावसाची नोंद झाली आहे.

हिंगोली जिल्ह्यात अजूनही जोरदार पावसाची प्रतीक्षा आहे. सध्याच्या पावसामुळे पिके धोक्याबाहेर निघाली आहेत. हा पाऊस पिकांसाठी लाभदायक असल्याचे शेतकऱ्यांतून बोलले जात आहे. मात्र, बोरवेअल आणि विहिरींची पाणीपातळी अजिबात वाढलेली नाही. त्यामुळे भविष्यात अडचणी निर्माण होण्याची शक्यता नाकारता येत नाही. जिल्ह्यातून वाहणाऱ्या कयाधू नदी पत्रात पाणीसाठा कमी आहे. हिंगोली शहरापासून काही अंतरावर असलेल्या कयाधू नदीमध्ये मोठ्या प्रमाणात प्लास्टिकचा साठा झालेला आहे. यावर्षीच्या पावसाळ्यात एकदाही कयाधू नदीच्या पाण्याची पातळी वाढलेली नाही. जिल्ह्यात सुरू असलेल्या संततधार पावसामुळे मात्र रस्त्यांची दुरवस्था झाली आहे. अपघाताच्याही घटना मोठ्या प्रमाणात वाढल्या आहेत.