हिंगोली - देशातील एकूण बारा ज्योतिर्लिंगापैकी आठवे ज्योतिर्लिंग असलेल्या, औंढा नागनाथ येथील नागनाथाची इतिहासात पहिल्यांदाच भाविकांविना पूजा करण्यात आली आहे. एरव्ही श्रावण महिन्यात मंदिर परिसरात भाविकांच्या मध्यरात्रीपासून रांगा लागतात. यंदा मात्र सर्वत्र शुकशुकाट पाहायला मिळत आहे.
आज श्रावण महिन्यातला पहिला सोमवार असून देशात ठिकठिकाणी मंदिरात पूजा करण्यात येत आहे. देशातील एकूण बारा ज्योतिर्लिंगापैकी आठवे ज्योतिर्लिंग असलेल्या, औंढा नागनाथ येथेही नागनाथाची पूजा करण्यात येत आहे. मात्र, इतिहासात पहिल्यांदाच भाविकांविना ही पूजा करण्यात आली. संस्थांनचे अध्यक्ष तथा तहसीलदार पांडुरंग माचेवाड यांनी सपत्निक व पुजारी यांनी नागनाथची शासकीय पूजा केली. एरव्ही श्रावण महिन्यामध्ये या मंदिर परिसरामध्ये भाविकांची अलोट गर्दी असते. शिवाय अनुचित प्रकार घडू नये म्हणून चोख पोलीस बंदोबस्त देखील तैनात राहतो. यंदा मात्र सर्वत्र शुकशुकाट आहे. भाविक रात्रीपासूनच दर्शन घेण्यासाठी रांगा लावतात. रांगेमध्ये सर्वात समोर असलेल्या भाविकांना शासकीय पूजेत बसण्याची संधी दिली जाते. मात्र यावर्षी आलेल्या कोरोना महामारीमुळे सर्व परिस्थिती बदलली आहे.
हेही वाचा - मराठा आरक्षणप्रश्नी कौन्सिलरचा सर्व खर्च उचलण्याची तयारी; देवेंद्र फडणवीसांची ग्वाही
कोरोनाचा प्रादुर्भाव पाहता शासनाच्या वतीने सुरक्षेच्या दृष्टिकोनातून सर्व धार्मिक स्थळांवर भाविकांसाठी प्रवेश बंद ठेवण्यात आला आहेत. दरवर्षी श्रावण महि्न्यात औंढा नागनाथ मंदिर परिसरात भाविकांची प्रचंड गर्दी होत होती, तर मुख्य रांगेत गर्दी सर्वाधिक जास्त असल्याने, या ठिकाणी असलेल्या व्हीआयपी रांगेत दर्शन घेण्यासाठी भाविक येत होते. पावती देऊन व्हीआयपी रांगेत आलेल्या भविकांकडून मंदिरात अभिषेक करण्यात येत होता, त्यामुळे संस्थानमध्ये आर्थिक व्यवहारही होत होते. हे पूर्वीपासून चालत आलेले आहे. यानिमित्ताने दरवर्षी लाखो रुपयांची उलाढाल होते. मात्र, यावर्षी इतिहासात पहिल्यांदाच मंदिरात भविकांविना शुकशुकाट पसरलेला दिसत आहे. दरम्यान, देशावरील कोरोनाचे संकट दूर व्हावे, अशी प्रार्थना नागनाथाच्या चरणी करण्यात आल्याचे अध्यक्ष तथा तहसीलदार पांडुरंग माचेवाड यांनी सांगितले.
